Ji bo yên nizanin: Muhsin Kizilkaya di sala 1963’yan de li Çelêya Culemêrgê hatiye dinê. Kurd e. Rojnameger, nivîskar û werger e. Ew dibêje, “bi xêra min wêjeya kurdî hat naskirin” Lê ger em bibêjin “bi xêra wêjeya kurdî tu hatî nasîn?” Welhasil, meseleya me ne ev e. Meseleya me ew e ku kurdekî, bi ser de jî kurdekî ji Culemêrgê çawa diçe dibe alîgirê partiya desthilatdar; ew partiya ku di serdema wê de bi sedan kurd hatine kuştin û yek jî kiryarê wan kuştinan nehatiye dîtîn?
Mesela me ew e ku ev kurdê ku bi rehetî dikare du gotinan bîne ba hev van her du gotinan çima ji bo neheqiya li kurdan bikar tîne?
Ji ber vê, zûdeye min dixwest li ser Muhsin Kizilkaya nivîsek binivîsim. Min gelek caran nivîs û dîtinên wî yên çewt dîtine û her xwestiye binivîsim lê nebû nesîb.
Dema li Somayê ew qas mirov mirin û ew rabû li ser Wezîrê Enerjiyê nivîsek nivîsî û pesnê wî da, ez gelek êşiyam. Min ji xwe şerm kir. Bifikirin li cihek 300 kes dimirin, tu radibî dibêjî 'wezîr du roj in gomlekê xwe neguhartiye, dixebite'. Û heman wezîrî çend meh berê pesnê xwediyê wî cihî dabû ku çiqas baş e. Dîsa min xwest binivîsim lê, na; her min got dev jê berde.
Piştî ku roja 5'ê tîrmeha 2015’an, di rojnameya hikumetê SABAH’ê de hevpeyvîna bi Kizilkaya re hat weşandin (1) û ew wekî "Mexdûr" nîşan da, mijar ji bo min nû bû û ev not derketin holê.
Û hinek jî ev gotinên wî zor li min kir ku ez binivîsim: “Her kurd mecbûr ba biba HDP’yî, dê hemû tirk bibana MHP’yî.” Belê, ne ku Kizilkaya ji ber di nav AKP'ê de ye ez jê hez nakim; ji ber ku tenê "çenebazî" dike, tiştên ne rast dibêje, neheqiyê li kurdan, neheqiyê li kesên deng dane HDP’ê (ku ez jî yek ji wan im) dike min pêdivî pê dît ku bersiê bidim.
De fermo em bi hev re lê binêrin ka wî çi, çawa gotiye û rastiya mijarê çi ye?
(Ji niha de lêborînê dixwazim ku nivîs piçek dirêj bû):
- Muhsin Kizilkaya ji bo Haberturkê dibêje: "Ji Demirel heta Kenan Evren kî neheqî û zilm kiribe, partiya siyasî ya kurd niha tola vê ji Davutoglu û Erdogan digire. Lê yê herduyan jî bandora wan ne di kuştinek kiryarnediyar, ne jî di valakirina gundek de rola wan heye.” (2)
Tenê mînakek ez bidim: 28.09.2009, li Mezraya Paşaçiya (Xambaz) a Licê Ceylan Onkol bi guleya topê ku hat avêtin hat kuştin.(3) Kes ji ber vê bûyerê nehat cezakirin. Wê çaxê Serokwezîrê Tirkiyeyê Erdogan, Serokomar Gul û partiya hikumetê AKP bû.
Nizanim Kizilkaya xwendekarê dibistana seretayî Abdullah Duran ê biçûk ku di 28’ê adara 2006’an de li Amedê hat kuştin nas dike? Nizanim hay jê heye ku kujer pê çi bûn?
- Di heman hevpeyvînê de dibêje "Belê wekî Roboskî bûyerên biêş çêbûn, lê Erdogan keça xwe, jina xwe şand wir; her wiha wezîran gelek caran got xeta çêbûye.
Herhal nayê bîra Kizilkaya ku piştî bûyera Roboskî Erdogan sipasiya Serfermandariya Giştî kir?
Herhal haya Kizilkaya ji welatên hemdem tune ye, di bûyerên wisa de yên ku biryar dane têne darizandin ku li Tirkiyeyê kes nehat darizandin û di bûyerên wisa de dewlet bi awayekî fermî lêborînê dixwaze, li vir dest ji wê berde, her roj bi ser Roboskiyan de zor û tehde heye.
- (ji heman hevpeyvînê li ser pirsa "Tu dixwazî HDP bendavê derbas bike?) “Na. HDP bendavê derbas neke AK Partî dê bi lez bikeve nava hewldana Zagoneke Bingehîn a demokratîk û dê çêbike. Ger HDP bendavê derbas dike dê li pêşiya Zagona Bingehîn a Demokratîk bibe astenga herî girîng.”
Pêşî, mirov nexwaze dengê 5-6 mîlyon mirovî bikeve meclisê û partiyek belaş van dengan bigire bike bêrîka xwe, ev yek ne li gor demokrasiyê ye, ne li gor edaleta Îslamê ye, ne li gor mafên mirovan e. De ji van Kizilkaya xwe di ku de dibîne bila lê pîroz be.
Xala din jî ev e: Ev 13 sal in AKP desthilatdar e, çima zagona ku Kizilkaya qal dike çênekir? Bi têra xwe hejmara mebûsên wê jî hebûn. AKP'ê kîjan KHK (Kanun Hukmunde Kararname - Biryarnameya di asta zagonê de) dixwest derdixist, çi zagon dixwest (herî dawî zagona ku hêzê dide polîsan) ligel nerazîbûna muxalefetê jî derdixist, ma çima zagoneke demokratîk çênekir?
AKP berî bibe desthilatdar ji bendava sedî 10'ê bigire, heta YOK'ê heta RTUK'ê, heta Serokatiya Karên Olî, dijî her tiştî derdiket, piştî bû desthilatdar hemû li gor xwe şikil da wan.
Temam tu AKP'ê diparêzî biparêze lê hinek bi wijdan be.
- (ji heman hevpeyvînê) “Li vî welatî tekane rêpîvan ji bo demokrasî û dîktatorî ew e ku wekî Î.Beşîkçî, Y.Kemal, N. Hîkmet çend kes di girtîgehê de ne? Çend pirtûk hatine qedexekirin?”
Bersivê bila ÇGD bide:
Li gor Rapora Çapemeniyê ya Avrêl-Gulan-Pûşper (2015) a Komeleya Rojnamegerên Hemdem (ÇGD) di van sê mehan de der barê 26 nûçegîhan, nivîskar, berpirsê karê nivîsaran û gerînendeyên weşanê de doz hatiye vekirin û di van lêpirsînan de ji bo 19 rojnamegerê daxwaza cezayê hepsê hatiye kirin.
Wekî berê jixwe pirtûk nayên qedexekirin. Îro êdî her cure pirtûk dikarin bi navên cuda di tora civakî de bêne weşandin.Pêdivî bi wê qedexeyê nemaye. Û em dizanin ev hikumet heta dikare sansurê dide ser tora civakî. Dîsa em dizanin gelek rojnameger ji ber li dijî hikumetê bûne ji rojnameyên xwe hatine qewirandin. Muhsin beg dîsa bi "Alo Fatih"an jî dizanin. Lê dîsa jî tu dixwazî nîşan bidî ku demokrasî heye, dîktatorî nîn e, hema bila wekî te be.
- (02.06.2015,di hevpeyvînek din de wisa dibêje): "Li Tirkiyeyê pirsgirêka kurd tune ye, pirsgirêka kurdî heye. Sedî 75'ê kurdan wekî min, sedî 25'ê kurdan wekî HDP'ê difikirin.” (4)
Mêro, ger sedî 75'ê kurdan wekî te difikirin tu ji Culemêrgê yî çima tu neçûyî li Culemêrgê nebûyî berendam? Tu wisa derewçiyî piştî vê hevpeyvîna te bi 5 rojan wan kurdan nîşanî te jî, nîşanî partiya te jî da ku ka çend kurd wekî te difikirin.
- (Di hevpeyvînek de wisa dibêje) "Gotin HDP bendavê derbas neke dê bûyerên wekî bûyerên ji bo Kobanî derkevin holê. Ji bo vê yekê hilbijêrên mihafezekar yên AK Partî ji bo pêvajo zerar nebîne, ji bo ew bikevin meclisê tercihek kirin."
Ew ji ku hilbijêrên AKP'ê bûn? Wekî ku AKP ev sed sal in heye, ev sed sal in ew mihafezekar deng didin AKP'ê, niha ji bo selametiyê deng dane HDP'ê. Lê rastî ew e ku beşek kurdên mihafezekar ev dehan salan in deng didan partiyên desthilatdar (Ji AP, ANAP,DYP û van salan jî AKP). Vegera wan bixwehesînek e. Bersivek e ku gotine nûnerên me ev in. Îro ew êdî ne hilbijêrên AKP'ê ne. Berevajî van gotinên Kizilkaya, van hilbijêran dît ku AKP ji bo Kobanî dibêje "Ket, wê bikeve" û pêre bi ser xwe de hatin.
- (Mêro wisa dibêje) "Partiyên ku bangî şer kirin di vê hilbijartinê de quwet girtin, AK Partiya ku di her rewşî de xwedî li pêvajoya aştiyê derdiket deng winda kirin".
Erê carinan mirov derewan dike, lê ew qas derewên mezin jî nabin lo! Erê mirov bîrkor in, lê bi qasî bûyerek hê çendek berê çêbûbe ji bîr bikin ew qas ne bîrkor in. Ka de bêje, yê ku ew 10 Xalên Dolmabahçeyê qebûl nekirin, yê ku got (maseyek wisa nîn e) kî bû?
AKP'ya te li ser pêvajoya çareseriyê du peyv jî nexistin Danezana Xwe ya Hilbijartinê û piştî pirsan, gotin ‘dema here çapê ew rûpel jêketine’. Ma ev mesele wisa meseleyek biçûk e çend rûpel ji danezanê bikevin?
Û HDP… HDP'ê di danezana xwe de xwedî li wan 10 Xalan derket û eşkere kir. Ka kî li pêvajoya aştiyê xwedî derneket?!
- (Di hevpeyvînek din de wisa gotiye): "Ger piştgiriya Komara Tirkiyeyê neba dê DAIŞ'ê Kobanî bigirta. Peyva 'Ket, wê bikeve' gotinek li hemberî bêdengiya Ewrûpiyan bû." (5)
Agir bi mala te nekeve. Heta ku çeteyên DAIŞ'ê tam neketin nava Kobanî, heta ber bi dawî ve jî nehatin di serî de HDP, û hin welatên derve xwestin Tirkiye korîdorê veke. Salih Muslim bi xwe hevpeyvîn da, gotin rê vekin em bi pereyên xwe çekan bistînin, dîsa Tirkiyeyê rê venekir. Heta ku DYA'yê (Dewletên Yekbûyî yên Amerîkayê) mêze kir Tirkiye rê venake, bi balafiran ji hewayê de ji bo YPG'ê amûrên şer avêtin. Ha, tam wê kêliyê diyar bû ku dê Kobanî nekeve. Piştî wê kêliyê Tirkiye mecbûr ma rê li ber çûyîna pêşmergeyan vekir.
Erê Muhsin Kizilkaya tu kesek koneyî, dizanî peyvan û deman tevlihev bikî, lê bizane ku ê me jî piçek be jî bîr û aqilê me heye.
(ji heman hevpeyvînê): "Erdogan Zagona Bingehîn biguherîne dê pêşî li mafê perwerdehiya bi zimanê zikmakî veke."
Ne ez, bila Dengîr Mîr Mehmet Firat bersiva vê gotinê bide, fermo: "Dema min jêre got 'Gere em ji bo kurdan bi zimanê zikmakî dibistanan vekin', Serokwezîr Erdogan wisa bersiva min da, 'Ma dewleta wan heye em ji bo wan dibistanên bi zimanê zikmakî vekin?' Dîsa min mafê axaftinê girt û got 'Ji aliyê mantiq ve tiştek şaş e em têkiliya ziman û dewletê bi hev ve girê bidin. Ji ber ku îro li dinyayê nêzî 200 welatî hene, lê bi 5 hezar zimanan mirov diaxivin. Hema em bibêjin bila tu têkiliya dewlet û zimanan nebe jî, 70 heb mebûsên we yên kurd hene. Hûn di heman demê de Serokwezîrê kurdan in jî. Lewre Komara Tirkiyeyê dewleta kurdan e jî. Ligel kurdan hatiye rizgarkirin û avakirin. Di zankoyan de hûn li ser zimanên mirî jî dersan didin lê zimanê 20 mîlyon kurdî nadin hînkirin. Ez wekî hemwelatiyekî vî welatî dixwazin zarokên min kurdî hîn bibin. Ji bilî 1-2 mebûsên kurd kesî piştgirî neda min. Ji Serokwezîr jî jixwe qet deng derneket." (6)
Belê te got çi Muhsin Kizilkaya? Bersiv bes e yan na?
Notên ji twitterê
Ez di twitterê de Muhsin Kizilkaya naşopînim. Dema min xwest li ser tiştinan binivîsim min xwest li twittera wî jî binêrim.. . Ev Muhsînê xwe wisa kurd dihesibîne, dest ji kurdîtiyê berde, wekî mirovek, wekî siyasetmedarekî nekariye tiştek li ser Hamdulah Oge ê ajokarê erebeya HDP’ê ku li Çewligê hat kuştin tiştek binivîse, bûyerê şermezar bike. Ka li ku ma mirovatiya te?
Welhasil. Vane ji twittera wê çend gotinên ku ketin ber şûrê min:
- "Dema Meclis bi rê ve dibir li aliyê çepê wî kesek sergirtî (bi turban), li aliyê rastê D.Ocalan rûniştibû. Ev yek deyndarê demokratîkkirina AK Partî ne.”
Derew! Dîlek Ocalan bi keda Tevgera Bakur ku ev 30-40 sal in dide hat wir. Meseleya 'Başortu' jî ne bi keda AKP'ê tenê, çiqas AKP'ê ked dabe mînak mebûsa HDP'ê Huda Kaya jî ew qas ked daye. AKP'ê ger demokrasî çêbikira bila pêşî bendava sedî 10'ê rakira ku li Tirkiyê her partî bikaribe bikeve meclisê.
- (Di twitterek ku van rojên dawî de nivîsandiye de jî wisa dibêje): "Li welatek ku dîktatorî lê hebe 4 partiyên siyasî dikarin bikevin meclisê?"
Du tiştan mirov dikare bibêje; Li Sûriyê dîktatorî heye, lê di Hilbijartina Serokomariyê ya Sûriyê ya dawî (03.06. 2014) de ligel Esad du berendamên din jî hebûn. Li Almanyayê dema Hitler hat ser kar, bi hilbijartinê hat û pêre çend partiyên din jî ketin hilbijartinê û ketin meclisê.
Xalek din, ew 4 partî ne bi daxwaz û rêlibervekirina AKP'ê ketine meclisê, berevajî vê, Muhsin Kizilkaya, Y. Akdogan û gelekên AKP'ê yên wekî wan nedixwestin ew qas partî bikevin meclisê. Jixwe bêsebeb mezinê wan 400 nedixwest... Niha partiyan ligel hemû bêeladetî, bi hêza xwe ketine meclisê, mêro radibe çi dibêje...
- (ji twittera 05.06.2015): "Ak Partî kurd ji bin zilma dewleta zalimkar xilas kirin."
Belê rast e ji Yewnanistanê hikumeta Syriza, biborin hikumeta CDU-CSU'ya Almanyayê hat bi ser Roboskî de bombe barandin.
Serokomarê Fransa Hollande di sala 2006’an de ji bo gelê li Amedê got: "Ew zarok bin jî, jin bin jî tiştê divê dê bê kirin” û pêre kuştinan dest pê kir.
- (ji twittera 10.06.2015): "Di temamê dîroka Komara Tirkiyeyê de tekane partiya ku ji kurdan re gotiye "kurd" Ak Partî bûye. Hin kurd jî rabûn ew (AK Partî) ji bo xwe kirin neyar."
Ozalî ji bo kurdan meseleya federasyonê jî dida nîqaşkirin, Demirelî qala "Realiteya Kurd" kir, Yilmazî gotibû "Rêya YE'yê ji Amedê re derbas dibe"... Ligel van gotinan jî di van salên 90'î de siyasetmedarên kurd hatin binçavkirin, hatin windakirin û hatin kuştin.
Û belê AKP'ê qala kurdan kir, lê di vê demê de jî bi hezaran (binêrin "Operasyonên KCK'ê") siyasetmedarên kurd hatin girtin. Erê nehatin kuştin lê her yek herî hindik 2,3,4 salan girtî ma. Ew AKP’ya ku qaşo qala kurdan kir, li Amedê, li pêş çavên wan kurdan got “Emê Girtîgeha Amedê xira bikin û bikin dibistan.” Na, emê nekin muze, emê xira bikin, emê we bîrkor bikin.
Wekî din hewce dike mirov dirêj bike.
1-
http://www.sabah.com.tr/pazar/2015/07/05/ben-uzlasmanin-temsilcisiyim
2-
http://www.haberturk.com/gundem/haber/1083424-kibirliydim-muhafazakrlarin-donusturucu-gucunu-gordum
3-
http://www.bianet.org/bianet/siyaset/124372-ceylan-onkol-patlayiciya-vurmadi-korunmaya-calisirken-oldu
4-
http://t24.com.tr/haber/muhsin-kizilkaya-solcuydum-devrimciydim-akp-beni-inandirdi,298541
5-
http://www.semdinlihaber.com/makale/firat-o-polis-baskininda-kapi-acilsa-demirtas-infaz-edilecekti-h27473.html
6-
http://www.radikal.com.tr/politika/dengir_mir_mehmet_firat_erdogan_ile_arasinda_gecen_konusmayi_acikladi-1345021
.jpg)
.jpg)
.jpg)
.jpg)
