.jpg)
Carinan bo balê bikşînin ser rewşa me kurdan, ev gotin tê ser zimanan: “Em sed salî piştî wan tên”.
Ji ber rewşa bêstatûyê erê, di gelek aliyan de em sed salî piştî wan tên!
Tiştên ji bo wan li dawiyê mane, de-mode bûne em wekî Amerîkayê ji nû ve kifş bikin, xwe davêjin ser, pê kêfxweş dibin ku me tiştekî nû kifş kiriye!..
Lê ya rast, xelkê ew tiştê bo me nû ji zû ve ye ku kevn kiriye; bo em sed salî li paş wan tên ew tişt bo me nû ye, ne bo cîhanê..
Belkî bes ne em, li hemû neteweyên di rewşa me de wisa ye, nizanim…
Yek jî tiştê bêstatuyan ê dişibe hev alozî-kaos in!
Kaosên ku xelkê sed salî beriya vê jiyane, em hê nû nû bi wan kaosan re rû bi rû dimînin; dikevin wê derûniyê-modê; yanê sed salî piştî wan in!
Nemaze huner-wêje! Lewnên wan helbest, sînema û mûzîkê didim alîkî!
Lê di mijara roman, çîrok û wêne-keval-şêwekariyê de ez bi ew ên dibêjin: “Em sed salî piştî wan tên” re me.
Belkî ji ber derfetan-navgînan; cotkarekî me dikare sed salî piştî wan were, şivanekî me jî wisa, dîkandar jî, siyasetmedar jixwe wisa ne…
Ya wan tê famkirin, lê ya hunermend? Lê ya wêjekar lê ya şêwekar? Di vê serdema ku teknolojî her tiştî radixe ber çavên me (dixe kefa destê me) çawa hunermend-wêjekar tevî cotkar, dîkandar, siyasetmedar, ango çawa bi civaka sed salî li paş mayî re tê!?
Erê, pirsgireka me ya sereke hê ya wê sedsala beriya vê ye, lê cîhan ne ew cîhan e, ev serdem ne ew serdem!..
Erê alozî-kaos, nakokî hene û kûrtir in, lê Spaniya ne ew Spaniyaya Pîcasoyî ye, Amerîkaya Latîn ne Amerîkaya Latîn a Marquez e! Loma, belkî spanyolan dev ji şêweya Pîcasoyî berda bin, belkî Latînan dev ji vegotina Marquezî berda bin lê yên sed salî li piştî wan tên hê li pey wê vegotinê, wê çîrokê, wî kevalê bi wan xêzan in!
Lewma hin rist li aloziya sed salî beriya vê diçêrin, firçeyê xwe ji aloziya Pîcasoyî xilas nekiriye û derûniya di metnê de hê wekî ya Şerê Cîhanê yê 1'emîn û 2'yemîn e û lêgerîn hê ya serdema nifşê Beat e, balam..!
Erê huner şahid tomarkar e, hunermend çavdêrê SERDEMA XWE ye, lê çima hin huner-wêje naşibin a vê serdemê dişibin a wê serdemê? Sed salî li paş yên din tên!..
Hêma, wate, wênandin, rist, honek ji wê serdema borî ne, ne ji vê serdema ciwan-teze!..
Ger kaos heman kaos be jî lê rengê wê ne yê wê sedsalê, yê vê sedsalê ye; heta hin tiştên xwe nîşanî me didin ne yên vê serdemê yên serdema bê ne!!!
Bêşik, hunermend-wêjekar ew e, yê ji kaosan hunerê-wêjeyê zevt dike ye, lê ne ji kaosên serdemên ku hunera wan hatî çêkirin, wêjeya wan hatî nivîsin, kevalên wan hatî çêkirin e, ê huner-wêjeya serdema xwe çêdike, dinivîse ye...
.jpg)
.jpg)
.jpg)
