Cemil Oguz

32'yemîn Festîvala Fîlman a Navneteweyî ya Stenbolê ku heta 14'ê avrêlê li dar e têde digel bi ser 200'î re fîlmî hin fîlmên derhênerên kurd jî têne nîşandayîn. Ji wan yek jê fîlmê metrajdirêj yê Omer Leventoglu, yên din belgefîlm in.
Vane ew fîlm, derhênerên wan, roja nîşandayîn û saeta nîşandayînê:

Mavî Rîng

“Mavî Rîng” yekemîn fîlmê metrajdirêj ê derhênerê kurd Omer Leventoglu.
Fîlm li ser beşeke berxwedana girtiyên li girtîgehên Tirkiyeyê ye. Girtî di rîngekê de, di nav kele kela germê de, 18 saetan bê rawestan ji girtîgehekê dibin girtîgeheke din. Fîlmê “Mavî Rîng” çîroka vê rêwîtiyê, bi ser çîroka Doktor Pinar ku li Nexweşxaneya Dewletê Doktor ve vedibêje.
Kunye:
Derhêner: Omer Leventoglu
Lîstikvan: Ezgi Çelik, Kemal Ulusoy, Diyar Dersim, Bilal Bulut, Erdal Ceviz, Nazmi Kirik, Şerif Şahiner, Sezgin Cengiz
Mawe: 87 dq
Ziman: Tirkî-Kurdî
Roja nîşandanê: 13.04.2013, saet, 21:30, Salona Beyoglu

Fecîra

Yek ji belgefîlmên ku bi kurdî ye û di festîvalê de cih girtiye “Fecîra” ye. Derhêneriya belgefîlm Pîran Baydemîr kiriye. Belgefîlm li Dêrsimê li gundê Şakak derbas dibe û çîroka Besna û keçên wê Devrîm û Melekê nîşan dide. Li Dêrsimê dewlet dixwaze bendavan çêbike. Belgefîlm jî bandora vê yekê ya li ser karakterên xwe derdixe pêş.
Kunye:
Derhêner: Piran Baydemir
Mawe: 40 dq
Ziman: Kurdî (Kirmanckî)
Roja nîşandanê: 09.04.2013, Saet: 21:30, Salona Muzeya Perayê

Was

Belgefîlmê Caner Canerîk “Was” ê bi kirmanckî li ser çîroka Fatmaya kerr û lal e. Ew ji bo xebatê bi berdêla gayekî dane mêrê wê Beser Demirtaş. Belgefîlm di ser çîroka wan re qala salên 90’î, salên şewitandina gundan jî dike.
Kunye:
Derhêner: Caner Canerik
Mawe: 75 dq
Ziman: Kurdî (Zazaca & Kurmancî)
Roja nîşandanê: 11.04.2013, Saet: 21:30, Salona Muzeya Perayê

Bûka Baranê

Belgefîlmê “Bûka Baranê” li Culemêrgê derbas dibe. Komek ciwan di sala 1989’an de li Culemêrgî li dibistanekê de bi hev re dixwînin. Paşê ew ji bo zanîngehê diçin bajarên cur bi cur. Piştî demekê ew dîsa tên ba hev, qala pêvajoya derbasbûyî dikin. Bûka Baranê qala çîroka wan dike, helbet tiştên hatine ser wan û wê derê jî.
Kunye:
Derhêner: Dilek Gokçin
Mawe: 68 dq
Ziman: Tirkî-Kurdî
Roja nîşandanê: 11.04.2013, Saet: 19:00, Salona Muzeya Perayê

Qiblenameya Diya Min

Yek ji belgefîlmên bi kurdî jî “Qiblenameya Diya Min” e ku derhêner Hatice Kamer kişandiye. Emîn ciwanekî kurd e ku ji ber rewşa polîtîk çûye Norwecê. Ew nikare vegere Tirkiyeyê. Diya wî ji bo dîtina wî diçe Norwecê û ew ji her alî ve ji bo çanda wir biyan3 iye. Lê tiştê herî zêde diya wî mijûl dike û şaş dike meseleya dîtina qibleyê ya ji bo nimêjkirinê ye.
Kunye: Derhêner: Hatice Kamer
Mawe: 55 dq
Ziman: Kurdî
Roja nîşandanê: 12.04.2013, Saet:  19:00, Salona Muzeya Perayê

Zemo

Di erdheja Wanê ya duyemîn de (9.11.2011), di Otela Bayram de 24 kesî jiyana xwe ji dest da. Du ji wan rojnameger bûn. Yek ji wan rojnamegeran jî Cem Emir bû. Belgefîlm çîroka jiyana Cem Emir nîşan dide.
Kunye
Derhêner: Kemal Emir
Mawe: 44 dq
Ziman: Tirkî
Roja nîşandanê: 11.04.2013, Saet: 16:00, Salona Muzeya Perayê