Necîbe Qeredaxî

Rewş li Başûrê Kurdistan gelekî aloz e, ji rewşa xetimînê gav avêt rewşa krîzeke kurtir û teqîna ku dihat texmîn kirin, rû da. Ji 3'ê Cotmehê ve gel daket kolanan û li hin cihên herêma Germiyan û Silêmaniyê buroyên PDK´ê hatin şewitandin û li pirr cihên din jî ala û ambilemên partiyan hatin daxistin. Ji vê rewşê dihat texmînkirin ku pirr pirsgirêk û krîzên li ser hevkombûyî hene ku nedihatin çareserkirin. Herêma Başûrê Kurdistanê xwe weke mînaka demokrasiyê ji bo tevahiya Iraqê nîşan dide, lê niha Serokwezîrê Iraqê Heyder Abadî gavên çaksaziyê davêjê û daxwaz li Herêma Kurdistanê dike ku krîza xwe çareser bike û çaksaziya pêwist bike. 

Gelê Kurd li herêma Kurdistanê ji wê zêdetir sebr û tehemûla wî nemaye ku çavê xwe li van nelirêtî û paşvexistina guhatinê bigire. Lewma jî daket kolanan û daxwazên xwe bi dengê bilind îfade kir, hem dayîna meaş, hem jîguhartinên bingehîn di sistema desthilatdarîya Başûrê Kurdistanê de, lê li cihê ku gav ji bo guhartinê werin avêtin di gavekê de ku nedihat hêvî kirin, wezîrê hundir ê PDK´yî, Kerîm Şengalî bêyî ku rewabûna wî hebe ji wezîrên Tevgera Gorran got, "neyên ser kar û herin mal", yekser piştî wî jî alîkarê Serokê Parlemanê Cafer Îminkî ji Dr.Yusuf Mihemed, serokê Perlemanê re got, "Vegerê cihê xwe li Silêmanî û cihê we li Hewlêrê nîne". PDK bi bahaneya ku Tevgera Gorran ewlekarîya Herêmê dixe tehlûkeyê van dike. Di heman demê de hemû ekîba nûçegihanên NRT û KNN, ku hin ji wan jî ji Hewlêrê ne, hatin girtin û piştî çend seat girtinê, nîvê şevê ew anîn xala kontrolê ya Dêgele ya ku di navbera Hewlêr-Silêmanî de ku weke sînorê di navbera hegemonya navberê PDK-YNK´ê de tê nasîn û di şerê navxweyî de hatibû kişandin. Dêgele ji bo Kurdan li Başûrê Kurdistanê êş û birînên şerê navxweyî yê salên 90'î tênê bîra mirovî. 

Hêvî ew bû ku gavên hatin avêtin, ji ber zêhnîyeta navendperestî ya partiyên desthilatdar yên Başûrê Kurdistanê, bi taybetî jî ya PDK´ê ne, nexwe li ku dera cihanê hatîye dîtin ku endamê mekteba siyasî ya partiyekê ji wezîrên partîyeke din an jî serokê Parlemanê re bibêjê" herin mal", ev zêhniyeta derba bi salan e ku ji bo gelê Kurd bûne sedema êş û windakirinê, timî ji aliyê dagîrkerên Kurdistanê ve hatine pêkanîn, lê ji bo cara yekem e ku ji aliyê hêzeke siyasî ve li hemberî hêzên din yê siyasî tê pêkanîn.

Di dawiyê de kîjan partiyê çi kiriye yan nekiriye ne girîng e, ya girîng encam e. Encam ew e ku wan modeleke nû pêşkeşê civakê nekirin, aramî ji bo civakê neanîn, pêdiviyên herî asayî yên rojane ji bo civakê temîn nekirin, hîn jî jin û zarokên Kurdan di destê DAIŞ´ê de ne, hîn jî jin tên kuştin û mafê azadîya ramanê tê binpêkirin, bi hezaran ciwanên Kurd hîna jî koçber dibin, ji wan hemûyan tehlûketir jî hîna jî DAIŞ gefan li gel û axa Kurdistanê dixwe, weke ku ev ne bes bin, li parçeyekî Kurdistanê sinor tên xêzkirin. Ev şermezariyeke mezin e û wê dîrok van rojan binivîse. 

Ji her demê zêdetir pêkhatina bereyeke demokratîk ji bo guhertina bingehîn a Başûrê Kurdistanê pêwîst e, dem hatîye ew partiyên xwediyê îdaya gohartinê pêşengiya pêkanîna bereyeke fireh bikin yan jî rê bidin gel çareseriya xwe bibînê û bi gule û şidetê li pêşiya gel nebin asteng. Nexwe ev alozî wê zirarê bide her kesî. 

Xala ku mirov geşbîn dike ew e ku gel di asteke bilind ya zanebûn û hişyariyê de ye, lê hewcedariya wî bi xwe rêxistinkirinê heye. Ji bo demokratîkkirina herêmê gava herî bilez û pêwist xwe rêxistinkirina bi zêhnîyeteke demokratîk e. Ev tekane dermanê derdê Başûrê Kurdistanê ye. 

13.10.2015

Yeni Ozgur Polîtîka