Diyarname

Deplasman de tam 3 golî werdî bî û bi 3-0 kaçe kerdebî vinî. Go kam bawer bikero ke kê xo de tam 4 golan berzo û tîmêke pîl zey Barselona destveng bişrawo keye? Verî maçe joy bivatê Liverpool go 4 golan berzo Barselona û yînan bişrawo belkî joy bawer nêkerdêna la ene nêbawerî bî bawerî û Liverpool tam bi 4 golan bi ser kewt; şî fînal.

Ma qalê maçey nîmfînalî a Lîgey Şampiyonan kenê. Liverpool û Barselona heftey bîn Camp Nou de hamebî vernî jobînî û Barselona bi 3-0 bi ser kewte bî. Rovanş emşo bî. Barselona rehete bî la Liverpoolî be heme quwetê xo xo kerd bî hedre. Maçe Anfield de bi heyecan dest pa kerde. Kaykerdoxê teknîk dîrektor Kloppî di deqey 7'inan de xo motî ra: Divock Origi di enî deqey de gole eyşte û tîmê xo 1-0 raver berd. Nîmey joyîn bi enî skorî qediya. Di nîmey diyin de Liverpool reyna bilez bî. Deqey 54 û 56'inan de Georgino Wijnaldum veciya meydan û bi di golan maçe berde 3-0.

Eno skor maçe berdê demo derg la Liverpoolî nêwaştê maçe bibo derge û deqey 79 de Origi reyna veciya meydan maçe û gole eyşte: 4-0.

Atakê Barselona feyde nêday û Liverpoolî bi 4-0 maçe girote, derbasê fînalî bî. Barselona ke bi awantaj hamîbî Îngilistan serê xo kerd verê xo û şî keye.

Barselona bî di rey ana kena vinî

Barselona di serdemê 2017-18 hemberî roma bi 3-1 maçe girote bî la maçey diyinan de kerd vinî. Enka reyna maçe joyînan bi 3-0 girotebî la reyna kerd vinî.

Di dîrokey Lîgey Şampiyonan de Liverpool bî tîmo hîriyin ke bi 3+ maçe keno vinî û dimara bi ser kuno. Di serey 1970-71 de Panathinakos, di serey 1985-86 de Barselona bi ser kewt bî, enka jî Liverpoolî dîrokêke bîne nişte..

Liverpool bî 9 rey vecêno fînal

Tîmê îngilîz Liverpool bi enî serkewtinî ra bî 9 rew vecêno fînal. Di serey 2017-18 de Liverpoolî hemberê tîmê Spanya Real Madrid bi 3-1 maçe kerde bî vinî û fînal ra geyrabî a. Liverpool di serey 1976-77, 1977-78, 1980-81, 1983-84 û 2004-05 de tam 5 rey kûpay  Lîgê Şampiyonan girote bî. Emsar qeybî rey 6'inan şî fînal.

Ajaks an Tottenham

Maça bîna ya nîmfînalî siba (8'ê gulanî) di miyanê Ajaks û Tottenham de yena keyredişî. Kam derbasê fînalî bibo go bibo reqîbê Liverpoolî. Maça joyîn de Ajaks 1-0 bi ser kewt bî.

Fînalê Lîgê Şampiyonan rocê 1'ê hezîranî de gol Stadê Metropolitano ke Madrîdê Spanya de wo bêro kaykerdiş.