Cemil Oguz

'Waw çapa Hemingway a salên 60'î', 'Rojnameyên 2'yê rezbera 1988'an hene?', 'Nexşeyên kevn hene?'. Em li Festîvala Sahafan in, bêhna dîrokê tê û her yek tiştek li ser dîrokê dipirse, lê digere.

5'emîn Festîvala Sahafan ku ji aliyê Şaredariya Beyogluya Stenbolê ve tê organîzekirin li Tepebaşiya Beyogluyê vebû. Di festîvalê de 72 sahafên ji nav Stenbolê û ji bajarên din di nav festîvalê de cih girtine, stand vekirine.

Pirtûkên kev, rojnameyên kevn, yên bi tîpên latînî, yên bi alfabeya erebî, yên destpêka sedsala 20'an, yên berî Komara Tirkiyeyê; nexşeyên kevn; pûl, kartpostal, posterên kevn ên bêhna nostaljiyê ji wan tên; kovarên kevn, vexwendnameyên kevn; her wiha hinek pêlîstok, hinek paketên cixareyê yên kevn ên wekî 'titûn', 'birinci' û hwd. Dîsa hin belge û tiştên wisa kevnare jî li standên sahafan peyda dibin.

Li festîvalê gelek tiştên bêhna dîrokê jê tê li standan peyda dibin. Di nav festîvalê de mêvan dikevin nav rêwîtiyeke dîrokî. Yek tê bi nazikî pirtûkek bi çapa kevn digire dest û lê dinêre; yekî din pirtûkê digire bêhn dike, yek wisa dibêje, "Li cem min jî gelek pirtûkên kevn hene." Em jî ketin navê, me jî xwe bera gera dîrokî da û di dawiyê de me hin tişt li ser kurdan jî dîtin ku di rojên pêş de wekî nostaljî di beşa "Foto-Nûçe" de emê biweşînin

Gele eleqeyeke baş nîşanî dokumanên kevn dide. Sahaf bi xwe jî ji bo vê eleqeyê dilşad in. Li wê derê her kesek tiştekî dipirse. Yek tê dîrokê bilêv dike û dipirse: 'Rojnameyên 2'yê rezbera 1986'an hene?'. Hema cih de em pirsa "çima ew roj?"ê dikin, dibêje, "Ew roja rojbûna min e, ez dixwazim ka wê rojê çi hatiye nivîsîn." Yek tê li nexşeyên kevnare dipirse. Keçikek dema li nav pirtûkên çapa kevn digere ji nişke ve hildipeke: "Waw çapa Hemingway a sala 60'î". Welhasil her yek tiştek dibêje, dipirse, her yek bi tiştek şa dibe. Carinan sahaf ji vê yekê aciz jî dibin. Yek jê bi kûbarî ji keçika li rojnameyên kev dinêre re dibêje: "Tu li kîjan dîrokî digerî bibêje ez alîkariya te bikim, her kes wisa lê dinêre, ji ber ku tevlihev dibin, ez careke din nikarim sererast bikim."

Ev çar sal bûn ku Festîvala Sahafan li Meydana Gerê ya Taksîmê li dar diket, lê îsal li Tepebaşiyê ye. Yek ji Sahafan dibêje; "Li Taksîmê zêdetir mêvan dihatin, firotin zêdetir bû, lê li vê derê jî baş e."

Ji bo kesên eleqedar em bibîr bixin ku festîval heta 18'ê mehê li dar e.

Ji bo wêneyên ji Festîvala Sahafan bitikînin: Li nav "Sahaf"an gereke dîrokî