Diyarname

Îro Roja Jinên Kedkar a Cîhanê ye. Ji 1857'an ve jin ber xwe didin. Lê îro li gelek bajarên kurdan û bajarên Tirkiyeyê jin ne ji bo mafên xwe, tenê, erê tenê ji bo li ser piyan bimînin, ji bo xwedî li zarokên xwe derkevin di nav kavilan de ber xwe didin.

Di Roja Jinan de helwest û nêzîktêdayîna herî girîng ew e ku ev pirsgirêka van jinan bê ziman, alîkarî bo wan bê kirin.

- Li bajarên erdhejê hê jî pêdiviya malbatan, helbet a jinan jî bi konan heye. Pêdivî bi konteyneran heye.

- Pêdivî bi cihên lê mayînê, cihên bi ewle û paqij heye.

- Pêdivî bi ava paqij heye, bi taybetî li Hatayê.

- Pêvidiyên jinan ên taybet hene wekî ped û tiştên din.

- Pêdiviya dayikan ji bo zarokên wan bi mama, şîr û tiştên wisa heye.

Û di rewşeke wisa de, li Stenbolê, ji bo ku jin neyên cem hev, banga daxwaza xwe nekin Walîtiya Stenbolê piştî saet 14'an seferên metroyê yên derdikevin Taksîmê dane rawestandin.

JINÊN KURD

Li Tirkiyeyê ji bo erdhejê çalakiyên jinan îsal ne wekî salên borî ne. Pîrozbahî nîn in. Lê li Rojava pîrozbahî hene û ev çend roj in didomin.

Bi hêviya ku her roj bi dilê jinan be, Roja Jinên Kedkar a Cîhanê bila li hemû jinan pîroz be.
***

ROJA JINAN JI KU TÊ?

Ji bo yên nizanin dîroka Roja Jinan:

- Sala 1857'an li bajarê New Yorkê yê DYA'yê 40 hezar karkerên dirûtinê ji bo rewşeke baştir li fabrîkeya tekstîlê dest bi grevê kirin. Polîsan êrîş kir 129 jin hatin kuştin. Ji ber vê bûyerê di sala 1910'an de, di Konferansa Jinên Sosyalîst a Navneteweyî de 8'ê Adarê wekî Roja Jinên Kedkar a Cîhanê hat qebûlkirin.

Ji sala 1911'an ve ev roj her tê pîrozkirin. 
***

Di Roja Jinan de gelek pêdiviyên jinan ên mexdûrên erdhejê hene.