Husên Duzen
Keça me Fatê, berî bi çend mehan dev ji Kurd1’ê berda û çû di televîzyona dewleta tirk TRT 6’ê de dest bi kar kir. Hîngê malpera înternetê Avesta Kurd, ev kirina Fatê wekî nûçe wisa dabû: “Hunermenda Kurd ya dengxweş û sempatîk Fatê, di televîzyona TRT-6 de dest bi pêşkêşkirina programekê dike...”
Wisa xuya ye ev bûyer ji bo peyamnêrê Avesta Kurdê zaf girîng bû ku wî/wê pêwîstî pê dîtibû ku rengdêra “hezkirî” li pêş navê hunermenda transferbûyî deyne; Fatêya ku di raya giştî ya kurdan de li gor hunera xwe dihat naskirin, bûbû “hunermenda hezkirî”. Piştî wê nûçeyê min ev çend peyvên li jêr di fecbookê de belav kirin:
“Ufff, Fatê! Ev çi ye? Ev ji ku derket? Di van rojên ku dewlet bi hemû hêzên xwe di êrîşeke nedîtî de ye, tu yê çawa ji dezgeheke ku her sibe bi "îstîklal marşî" vedibe re kar bikî? Min fam kir ku tu bi lêvkirina navê birêz Kemal Burkay dixwazî balê bikişînî ser wî. Na gidî, dev ji van tiştan berde. Tiştekî din,...: Qederê ez te nas dikim, tu ne keseke ku di hefteyê de 5 rojan programekê bi vî şêweyî pêşkêş bikî. Ji min gotin. Ji bîr neke, ne dûr piştî çend hefteyên din, dê hemû dinya bibe şahidê vê yekê.” (19.11.2011)
Belê, di ser re ne çend hefte tenê, bi mehan dem derbas bû; roj bi roj Fatê li ber çavê min biçûktir bû. Wekî min texmîn kiribû piştî du sê hefteyan eşkere bû ku tu rengekî vê “hunermenda hezkirî” tune ye. Çi jê hat xwestin, wê ew kir.
Doh min li beşeke programa wê temaşekir, ku bu sedemê nivîsandina van çend rêzan. Bi rûhiyeta keseke ku di dezgeheke dagirkerên welatê xwe de kar dike “hunemenda sempatîk” kêm zêde ev gotin ji xwe berdan: “Ez wijdanê xwe xera nakim, ji ber ku ez di TRT de kar dikim kesekî tu êrîş nanîne ser min, tu rexne li min nehatin kirin. Her kes, sipasdariyên xwe ji min re dibêje.” Piştre jî bi kenê xwe yê kal lê zêdekir: “Ezê rastiyekê jî li vir bibêjim” hîngê destê xwe avêt pozê xwe û dom kir: “Ez dixazim hinek pere bînim ser hev û pê pozê xwe emeliyat bikim.”
Wisa xuya ye ku tu derdê Fatê û êşa pozê wê di kêliya emeliyatê de tune ye. Ew ew qas bi pereyên TRT 6 bawer e ku ew dê ne êşê ne jî şewatê di kêliya emeliyatê de hîs bike.
Ma ne ev anesteziya poz, bêşewitîbûna poz e ku di bin pêlavên dagirkeran de jî hin kes xwe di rewşeke normal de his dikin?
27.04.2012
.jpg)
.jpg)
