Diyarname
Vê sibê li Amedrê polîsan bi ser MED-DER (Komeleya Lêkolîna Ziman û Çanda Mezopotamyayê) û Payîz Pirtûkê de girt.
Xebatkarên komeleyê hatin binçavkirin.

MED-DER di sala 2017'an de hatiye avakirin û heta niha her sal qursî kurdî li dar dixe, xebatên li ser kurdî didomîne. Ji bo serdema nû qeydên wan ên kurdî heta 25'ê mehê dom dikir û serê mehê dê dest bi serdema nû ya perwerdehiyê bikira. Lê îro polîsan bi ser komeleyê de girt û gelek rêveber û mamosteyên wê hatin binçavkirin. Rêveber û mamosteyên MED-DER'ê yên ku hatine binçavkirin ev in: Mehmet Remzî Azîzoglû (Hevserokê MED-DERê), Şukran Yakut (Hevseroka MED-DERê), Rifat Ronî(Nivîskar), Dîlan Guvenç, Nazan Çelîk, Îlyas Gun, Bêrîtan Gurbet Orak, Mîne Karakaş, Ramazan Holat, Hebûn Yagmûr, Ayhan Karatekîn, Bêrîvan Duman, Mehmet Salîh Ongun, Rabia Karayil,  Rêzan Aktulum, Belkisa Suleymanoglû Bitkîn, Fatma Îgîn.

Li aliyê din li Payîz Pirtûkê ku navenda wê li Ofîsa Amedê ye demek dirêj lêgerîn hat kirin û hin pirtûk hatin desteserkirin. Li Payîz Pirtûkê jî Xwedî û berpirsiyarê wê Cihat Guneylî hatiye binçavkirin.

Tê gotin ku der barê dosyayeke ku di sala 2022'yan de hatiye vekirin ev binçavkirin hatine kirin. Lê agahiyên li ser dosyayê veşarî ne.

Her wiha di çarçoveya dosyayê de rêvebera Jîn Art Huner a li Îzmîrê Belkisa Suleymanoglu Bitkin jî hat binçavkirin. Bitkin li Îzmîrê hat binçavkirin.

BI SER ANKA'YÊ DE JÎ GIRTIN
Piştî bi ser de girtina MED-DER û Payîz Pirtûkê, bi ser Koperatîfa Perwerdehî, Huner û Ziman ANKA'yê de jî girtin. ANKA Ziman ku li taxa Bagcilar a Baglara Amedê ye di dema bi ser de girtinê de polîsa dest danîn ser hardîskên wan.