Diyarname

Niha ji bo postê Serokomariya Iraqê PDK'ê jî, YNK'ê jî berendamekî nîşan daye. Li ser vê yekê li hev nekirine. Li ser vê yekê Serokê PDK'ê Mesûd Barzanî û Serokê YNK'ê Bafil Talabanî li Pirmanê li hev civiyan. 

Agahiya civînê ji aliyê çapemeniya YNK'ê ve hat ragihandin. Li gor nûçeyan di civînê de li ser postê serokomariyê axivîne.

Rojnameya erebî Şerq El Ewsat li ser vê yekê got "Her du partiyan li hev kiriye" û wiha nivîsî: “Agahî hatin bidestxistin ku Partiya Demokrat a Kurdistanê (PDK) û Yekitiya Nîştimanî ya Kurdistanê (YNK) li ser destnîşankirina namzetekî li hev kirine.”

YNK'ê Nîzad Amedê wekî berendam nîşan dabû, PDK'ê jî Fûad Husên nîşan dabû. Husên niha Wezîrê Karên Derve yê Iraqê ye. Her çiqas posta serokomarî di destê kurdan de ye jî heta niha 17 kesî xwe wekî berendam nîşan daye. Kordînasyona Şiî ku postê serokwezîriya Iraqê di destê wan de ye bang li her du partiyan kiribû ku yek berendamî û di demek zû de nîşan bidin, yan na ewê deng bidin kesek din.

Li aliyê din rojnameger Rasan Remzî li ser hesabê xwe nivîsî ku parvekirine wisa di navbera PDK û YNK'ê de çêbûye û li ser diaxivin:
Ji bo PDK'ê:
1- Serokatiya Herêma Kurdistanê
2- Serokwezîriya Herêma Kurdistanê
3- Wezîrtiya Karên Hundir
4- Wezîriya Konseya Ewlehiyê
Ji bo YNK'ê:
1- Serokomariya Iraqê
2- Wezîriya Karên Derve ya Iraqê
3- Wezîriya Maliyeyê (Li nav Herêma Kurdistanê, yan jî li nav hikumeta IRaqê)
4- Serokatiya Parlemena Kurdistanê