- Êvara tîma Amedsporê gihîşt Amedê. Vê êvarê her derê Amedê qada pîrozbahiyê bû. Rêza erebeyên pîrozbahî li dar xistin bi kîlometreyan dirêj bû.

- ROJAVA: Li Rojava li hemû bajar û navçeyan gel dest bi pîrozbahiya serketina Amedsporê kir. Tê gotin pîrozbahiya herî mezin li Hesenê wê li Parta 4'ê Avrêlê li dar bikeve.

- Serfermandarê Giştî yê HSD'ê Mazlum Ebdî ji bo Amedsporê peyama pîrozbahiyê belav kir û got, "Em ji dil hemû lîstikvan, xebatkar û hezkiriyên Amedsporê pîroz dikin ku bi ser ketin û gihîştin Lîga Super. Serketina we dilê hemû kurdan geş kir. Malî ava û her serketî bin."

ÎŞEV AMEDSPOR DIGIHÎJE AMEDÊ
- Piştî serketinê Amedsporê du peyam belav kirin: Klûbê pêşî ragihand ku dê saet 23.30 de bigihîje Amedê û raste rast dê here Parka Newrozê.
Dûre peyamek belav kir û got ku di vê dema bi coş de, dema temaşevan pîrozbahiyê dikin bila zirarê nebinin, bi taybetî dema erebeyê diajon, pîrozbahiyê dikin bila xesas tevbigerin

JI BAKIRHAN, ERDOGAN, OZEL, BARZANÎ, EBDÎ, TALABANΠPEYAM
Bakirhanî peyam belav kir:
- Hevserokê Amedsporê li ser X'ê peyam belav kir û got, "Ez Amedsporê ji dil pîroz dikim. Ev serkeftina dîrokî encama piştgiriya mezin a gelê me ye. Hezar carî malava! 
Her kesê ku dil daye Amedsporê îro pir bextewer e. Di Super Lîgê de jî em ê bi hemû hêvî û baweriya xwe ligel tîma xwe bin. Her bijî Amedspor!"
- Serokê AKP'ê û Serokomarê Tirkiyeyê Recep Tayyip Erdogan, Serokê Giştî yê CHP'ê Ozgur Ozel peyamek ji bo Amedsporê li ser X'ê belav kirin û tîm pîroz kirin.
- Serokê Herêma Kurdistana Federe Nêçîrvan Barzanî peyamek bo Amedsporê belav kir û got, "Bi germî û ji dil Amedsporê pîroz dikim ku ji bo Lîga Superê bi ser ket. Ev serketin her wiha li hemû piştevan û alîgirên Amedsporê pîroz be. Em bi vê serketina Amedsporê pir şa bûn, hêvîdar in ku ewê hertim bi ser keve û nûnertiya herî baş ya Amedê bike. 
Her bijîn, her hebin."
- Serokê YNK'ê Bafil Talabanî ji bo Amedsporê belav kir û ji bo derketina Lîga Super ew pîroz kir. "Ji dil pîrozbahiyê li endam, desteya rahêner û piştevanên Amedsporê ji bo serketina wan a ji bo Lîga Super a Tirkiyeyê dikim. Gihîştina Lîga Super a Tirkiyeyê hewl û keda we ya çend salan e ku ji bo me hemûyan bûye cihê dilxweşiyê. Dubare we pîroz dikim û serketinê ji we re dixwazim."
- Siyasetmedar Leyla Zana jî li ser hesabê xwe peyama "Amed berxwedan e! Her bijî Ameda rengîn, bijî" belav kir.

HIN ÎSTATÎSTÎK:
- Hin îstatîstîk: Di Lîga 1'emîn de lîstikvanê Amedsporê Mbye Diagne bi 30 golan bû golavêjê salê. Piştî wî ji Erzurumê bi 23 golan Eren Tozlu tê.
- Di Lîga 1'em de tîma bibe Şampiyon (Erzurumspor) 67 milyon TL prîmê digire. Tîma bibe duyemîn 38 milyon û 500 hezar TL wekî prîma derketina Lîga Super digire.
- Di lîgê de herî zêde Erzurumê gol avêtin: 82 gol. Dûre Amedsporê û Erokspor her yek bi 81 golan tên. 
- Di nav van her sê (Erzurum, Amed, Erok) tîman de herî zêde Amedsporê gol xwarine: 42 gol. Dûre Erok 35 gol û Erzurum bi 27 golan tê. Ev tê vê wateyê: Amedsporê ew qas gol nexwara, belkî biba şampiyon,belkî zûtir derketa Lîga Super.
- Ji aliyê asistan ve li Esenlerê Amilton, ji Çorum/Bodrumê Fredy tê. Li Amedsporê Murat Uçar û Dia Saba bi zêde asistan tên.

- Hesabê X'ê yên Beşiktaş, Galatasaray û Fenerbahçeyê li ser serketina Amedsporê peyama pîrozbahiyê belav kirin ew pîroz kirin. Ji bo hatina Lîga Super tîman xêrhatin li Amedsporê kir.

DÎTINÊN LÎSTIKVANÊN AMEDSPORÊ
- Mbaye Diagne: Ev der wekî mala min e. Ez ji Super Lîgê hez dikim. Wekî mala min e. Ezê vegerim Super Lîgê û rekora xwe ya 30 golan dîsa bişkînim.

- Kaptan Erce Kardeşler: Em gelek kêfxweş in, 10 meh in em ji bo vê dixebitiyan. Alîgirên me li vir in. Hefteyek em ranediziyan. Şikir em bi ser ketin. Ez tîmên din jî pîroz dikim. Piştgiriya temaşevanên me ji bo me alîkariya wan pir bû. Ew nebana belkî em bibana tîmek ji rêzê. Ew nebana belkî me nedikarî werin vir. Ez wan jî pîroz dikim.

- Lîstikvan Murat Uçar bi giriyeke serketî ji bo TRTSporê axivî, "Me demek zor derbas kir. Klûb pir mezin e. Gere em heqê wê bidin, em hatin rexnekirin, em giriyan, lê em li benda vê kêliyê bûn."

- Di Lîga 1'emîn de maç temam bûn. Erzerom bi 81 pûanan yekemîn û wekî şampiyonê lîgê derket Lîga Super. Dûre Amed û Erok tên, her yek bi 74 pûanan. Ji ber ku avarajê Amedsporê hebû (li mala xwe bi 2-1 bi ser ketibû li hemberî Erokê, di maça din de 1-1 bûn), Amedspor derket Lîga Super. 
Dûre bi rêzê ev tên: Çorum çarem, Bodrum pençem, Pendîk şeşem û Keçiorenguce bû heftem. Ji 4'em heta 7'em dê bi hev re play-offê bilîzin. Kîjan bi ser bikeve ligel Eroksporê wê bilîze û ji wan tîmek din jî dê derkeve Lîga Super.

- Bi bidawîbûna maçê re di serî de temaşevanên li Amedê li ber ekranan bûn, li wan û bajarên din dest bi pîrozbahiyê kirin

- MAÇ XILAS: Dq 90+11, hakêm ji bo dawîlêanîna maçê li firfirokê dide û maç xilas: 3-3. Bi vê yekê Amed Spor hat Lîga Super.

- Dq 90+7 li Stenbolê maç xilas, Erok-Pendik bi 1-1 man. Amedspor li benda deqeyên xwe ye; golê nexwe, ev 3-3 bi kêrî Amedsporê tê.

- Dq 90+2: Li Amedsporê Dia Saba derket Hasani ket, Gyan derket Emre Başsan ket sehayê.

- Dq 83: Li Amedsporê Moreno derket, Dimitrov ket sehayê. Cem UStundag derxist, Atakan Mujde ket maçê. 

- Gol: Dq 79: Lîstikvanê Igdirê Guray gog şand ber kelehê, Atakan Çankaya bi singê xwe li ser xêzê lê da: 3-3

- Dq 58 lîstikvanê Amedê Mehmet Yeşil seqet bû, Tarkan Serbest ket cihê wî.

- Dq 50, alîgirên Igdirsporê tiştek bi ser qeleparêzê Amedê Erce Kardeşler de avêtin. Erce li erdê ket. Maç sekinî. Tiştek wî tune ye, dîsa maçê dest pê kir.

- Gol: Dq 49: Gol Dia Saba. Gol da Diagne, Diagne da Dia Saba û Saba bi lêdaneke xweşik gol avêt: 3-2

- Dq 45: Nîveka duyemîn dest pê kir. Ji Igdirê Dogan Erdogan ket sehayê. Listikvan Doh qerta zer dîtibû, teknîk dîrektor Hikmet Karaman ew ji maçê derxist.

- Di maçên din de reqîbê Amedsporê yê ji bo rêza 2'yemînî Erokspor ligel Pendikê 1-1 e. Ev yek bi kerî Amedsporê tê. Ji bo hemû maçan 45 deqeyên din heye.

- Û hakêm Ali Yilmaz li gogê da, 45 deqe bi 2-2 bi dawî bûn.

- Gol: Dq 45+2: Ji kornerê goga hat li ber stûna kelehê li serê Diagne ket û encam bû 2-2

- Gol: Dq 41, ji kornerê gog hat, lîstikvanê Amedsporê Mehmet Yeşil li erdê ma. Maç dewam kir, piştî gog sekinî, VAR'ê gazî hakem kir. Hakêm çû VAR'ê û biryara penaltiyê da. Mbaye Diagne gog girt û şand nav torê: 2-1

- Dq 29 lîstikvanê Îdirê Bakuna bi serî lê da û gol avêt. Lîstikvanên Amedsporê li benda faûlê bûn, hakêm qebûl nekir. Hakêm çû VAR'ê û gol betal kir.

- Gol: Deqe 19: Hasan Ali Kaldirim goga ji kornerê hat bi şid lê da got û gol avêt: 1-1

- Dq 12 Giray lîstikvanê Amedsporê li erdê xist û qerta zer dît. Dia Saba raste rast li kelehê da, qeleparêz Taha gog şand kornerê.

- Gol: Di deqîqeya 6'an de Îdirê bi gola Fofana 1-0 derket pêş.

- Temaşevanên Igdirsporê diruşma "Igdir wê ji bo Amedsporê bibe goristan" bilind dikin.

- Lîstikvan bi pankarta "Em evîndarê fûtbolê, dijî çêran in" derketin sehayê.

- Hakêm Alî Yilmaz maçê bi rê ve dibe. Alî Yilmaz yek ji hakêmên Lîga Super e.

Maça Igdirspor û Amedsporê li Îdirê dest pê kir. Ji bo Amedsporê maçek gelek girîng e.Amedsporê li kelehê Erce kardeşler, bi Murat Uçar, Mehmet Yeşil, Oleksandr Syrota, Hasan Ali Kaldirim, Cem Ustundag, Sinan Kurt, Daniel Moreno, Fleix Afena-Gyan, Dia Saba, Mbaye Diagne dest bi maçê kir.

Li Amedê li navenda Amedê û li gelek navçeyan şaredariyan ekran saz kirine û ji wir li maçan temaşe dikin.