Diyarname
Di sala 2012'yan de gelek kesên qedirbilind xatir xwestin û ji nava me bar kirin.

Di vê salê de van kesan jiyana xwe ji dest da:

02.02.2012
Cenazeya Mele Ebdullah Varli li Erdîşê hat veşartin
 
Yek ji alimên kurdan Mele Ebdulah Varli roja 02.02.2012'yan jiyana xwe ji dest da û cenazeya wî roja 04.02.2012'yan, roja şemî, piştî nimêja nîvro li Erdîşê hat veşartin.
Mele Ebdullah Varli (navê wî yê li nasnameyê Mehmet Abdullah Varli) ku di encama qeyrana dil de wefat kir, di salên 90'î de ku kurdî hê zêde geş nebûbû meala Quran bi kurdî çêkir û weşand (1994. Lê di sala 1977'an de meala Quranê temam kiribû, ji ber qedexeyê nekaribû biweşîne). Ew wekî yekemîn kes ê ku meala Quran bi kurdî weşandiye jî tê nasîn. Seyda Varli gelek salan di diyanetê de xebitîbû, meala Quranê ku bi navê “Qurana Pîroz û Arşa Wê ya Bilind/ Kur’an-i Kerim ve Kurtçe Meali" amade kiribû û dabû diyanetê lê diyanetê ew neweşandibû.
Xebatên Varli yên li ser Ehmedê xanî û dîroka kurdan jî hebûn.

09.02.2012
Nivîskarê kurd Îbrahîm Yûnisî wefat kir 

Wergêr û nivîskarê navdar ê kurd Îbrahîm Yunisî roja 8'ê mehê li bajarê Tehranê wefat kir. Yûnisî ev çend sal bû ku bi nexweşiya alzheimer ketibû.
Dr. Yûnisî di sala 1925’an de li bajarê Bane ji dayik bûbû û xwedî zêdetir ji 10 berhemên nivîskî û 60 berhemên wergerê ye.
Yûnisî berî mirinê wesiyet kiribû ku cenazeyê wî li bajarê Baneyê veşêrin.

12.09.2012
Nivîskar Nebî Kesen wefat kir

Nivîskar û aborînas Dr. Nebî Kesen li Hamburga Almanyayê di encama qeyrana dil de jiyana xwe ji dest da.

Kesen êvara 11'ê mehê saet li dor 22'yan nexweş ket û ew rakirin Nexweşxaneya St. Georg lê digel hemû hewldanan jî nekarîn wî li jiyanê vegerînin.
Dr. Nebî Kesen ku zewicandî û bavê zarokek bû di 20'ê adara 1963'yan de li Cîhanbeyliya Konyayê hatibû dinyayê. Di dema derbeya 12'yê Rezbera 1980'yan ji mecbûrî derket derveyî Tirkiyeyê. Wî demek dirêj di rojnameya Ozgur Polîtîkayê de qunciknivîskarî kir.
 

14.10.2012
Seyda Abdurrehman Durre wefat kir

Seydayê kurd, yek ji avakarên Enstîtuya Kurdî ya Stenbolê Abdurrehman Durre li Kolna Almanyayê wefat kir. Cenazeya Durre dê li Milazgira Mûşê hat veşartin.

Seyda Abdurrehman Durre di sala 1930'yî de li Milazgira Mûşê hatiye dinê. Wî 15 salan di medreseyên kurdî de xwendiye û paşê miftîtî kiriye. Di navbera salên 1962-1975'an de miftîtî kiriye. Seyda ku bi zimanê kurdî, tirkî, edebî û farisî dizanî demekê li Libyayê mutercimiya erebî û tirkî kiriye. Deh berhemên wî yên bi kurdî,erebî, farisî û tirkî ku yên çapkirî û yên ne çapkirî hene, hin ji berhemên wî jî ev in: “Şerha Dîwana Ehmedê Xanî, Felsefe û Jiyana Wî”, "Kurdname", "Evîna Welat".

30.10.2012
Helbestvan Arjen Arî wefat kir
 
Helbestvan Arjen Arî ku ev demeke li nexweşxaneyê dihat dermankirin îro wefat kir.

Helbestvan û qunciknivîskarê rojnameya Azadiya Welat Arjen Arî ku demekê di Diyarnameyê de jî qunciknivîskarî kiribû û keda wî ketibû nav Diyarnameyê li Amedê wefat kir.

Nivîskar û helbestvan Arjen Arî di sala 1956'an de li herêma Omeriya, li gundê Çalê hatiye dinyayê. Di sala 1979'an de Enstîtuya Perwerdeyî ya Diyarbekirê Beşa Zimanê Tirkî qedand. Wekî gelek helbestvan û nivîskarên kurd wî jî bi tirkî dest bi helbêstê kir. Di sala 1976'an de li Nisêbînê ji ber belavkirina belavokekê hat girtin. Wê demê polîsan dest danîn ser helbestên wî yên bi tirkî û kurdî.

25.11.2012
Arşevê Oskan wefat kir

Nivîskarê kurd ê ji rojavayê Kurdistanê Arşevê Oskan roja 25.11.2012'yan ji ber nexweşiya qansêrê li Hamburga ALmanyayê jiyana xwe ji dest da.
Arşevê Oskan di sala 1967’an de Birkinêse ya girêdayî Dirbesiyê hatibû dinê. Rojnameger, helbestvan û nivîskar Arşevê Oskan ji ber zordariyên dewleta Sûriyê hatibû Ewropayê û li Almanyayê dijiya.

25.12.2012
Şerafettin Elçi wefat kir
 
Mebûsê Blokê yê Amedê, siyasetmedarê kurd û Serokê KADEP'ê Şerafettin Elçi ku ev demeke dirêj bû ji ber qansêrê dihat dermankirin wefat kir.
Elçi ku ev demekê bû li Nexweşxaneyeke li Enqereyê dihat dermankirin îro saet 18.40'î de ji ber pişikê û kêm nefesgirtinê dilê wî nexebitî û wefat kir.

***

Têbiniya Diyarnameyê: Agahiyên li ser 2012'yan her ku biçe emê biweşînin...

***

- 2012: 109 kes li girtîgehan mirin

- 2012: Li Qoserê pirtûkên ku herî zêde hatine firotin

- 2012: Li Girtîgehan binpêkirina mafan

- 2012: Peyvên ku herî zêde li wan geriyane

- 2012: Albumên herî serketî

- 2012: Li dinyayê kesên herî hêzdar

- 2012: 10 pirtûkên herî serketî yên New York Timesê

- 2012: Herî zêde van pere kar kir