QAMIŞLO

Bi însiyatîfa partiyên kurdî ên di nava Rêveberiya Xweseriya Demokaratîk de, di navbera Meclisa Gel a Rojavayê Kurdistanê û Encûma Niştîmanî a Kurd li Sûriyê de li bajarê Qamişlo civînek hate lidar xistin. Her du meclisan li ser berdewama danûstandinan li hev kir.

Îro di navbera MGRK û ENKS'ê de li bajarê Qamişlo civînek pêk hat. Civîn bi beşdarbûna  Hevserokê MGRK Ebduselam Ehmed, Endama Desteya Rêvber Îlham Ehmed, Endamên Komîteya Dîplomatîk a TEV-DEM'ê Ebdulkerîm Umer, Çinar Salih û Xedîce Ibrahîm lidar ket. Di civînê de Serokê ENKS'ê Tahir Sifûk, Endamê Buroya Siyasî ya Partiya Demokratîk a Kurdistanê-Sûriyê Nişet Zaza, Endamê Buroya Siyasî ya Partiya Yekîtî ya Kurdî li Sûriyê, Serokê Tevgera Reform û Veguherînê Feysel Yûsuf û Sekreterê Partiya Yekîtî ya Demokratîk a Kurd li Sûriyê amade bûn.

Civîn ji bo dezgehên çapemeniyê girtî pêk hat û nêzî 4 saetan dewam kir. Piştî ku civîn bi dawî bû Ebdulkerîm Umer û Tahir Sifûk ji bo dezgehên çapemeniyê daxuyaniyek dan.

Ebdulkerîm Umer destnîşan kir ku ji bo yekîtiya hêzên opozîsyona Sûriyê bi giştî partiyên siyasî yên di nava Rêveberiya Xweser de projeya yekbûyîna hêzên opozîsyona Sûriyê dane destpêkirin û wiha anî ziman: "Ji ber vê yekê pêwîstiya hevdîtina bi partiyên Encûmana Niştîmanî hebû da ku bibe destpêka guhertina rewşa Sûriyê bi awayekî demokratîk û piralî. Hin mijar hatin nîqaşkirin û ji bo diyarkirina çawatiya biserxistina vê projeyê dê hin civînên din jî bêne lidarxistin."

Li aliyekî din Tahir Sifûk jî da zanîn ku ew wekî destpêk, projeya her du meclisan a yekbûyîna hêzên opozîsyona Sûriyê erênî û pîroz dibînin. Sifûk girîngiya hevkariya di navbera her du meclîsê kurdî de û pêwîstiya çareserkirina pirsgirêkên di navbera wan anî ziman.

Li gorî agahiyên ku nûçegîhanê ANHA'yê bidest xistine, ji bo hevdîtinên bê Encûmana Niştîmanî a Kurdî li Sûriyê hin dem xwestiye da ku pariyên di nava encûmanê de şêwrên xwe bikin.

ANHA