Diyarname 

Di demeke ku bala Tirkiyeyê li ser doza der barê Ergenekon û doza Girtina AKP'ê de ye, duh bi şev li navçeya Gungorenê ya Stenbolê du bombe li pey hev hatin teqandin û di encama teqînan de jê 5 zarok bi giştî 18 kesan jiyana xwe ji dest dan û 150 zêdetir kes jî birîndar bûn. Lêkolîna polîsan a der barê kiryarên bûyerê de berdewam e, heta niha tu kes an jî rêxistinan bûyer negirtiye ser xwe.

Bombe di kuçeyeke navendî a qelebalix de hatin teqandin. Di niqaşên têkildarî mijarê de bêhtir awayê pêkanîna bûyerê li pêş e, çimkî di teqînan de rasterast xelkê sivîl hedef hatiye girtin.. Her wisa cara yekem e ku li Tirkiyeyê di bûyerekê de du bombe li pey hev hatin teqandin. Tê diyarkirin ku bombeya yekem bombeya deng bûye wekî xefik, ango ji bo ku xelkê li cihê bûyerê bicivîne hatiye teqandin; bombeya duyem jî 10 deqîqe paşê li heman cihî di nav xelkê ku ji bo alîkarî an jî meraqê li heman cihî civiya bû de hate teqandin... Ji ber vê yekê jî hejmara mirî û birîndaran pir zêde ye...

Xaleke din a girîng jî der barê bombeya ku di bûyerê de hatiye teqandin de ye. Tê diyarkirin ku di bûyerê de bombeya bi cureyê RDX hatiye bikaranîn, RDX ku wekî madeyek bi bandor tê zanîn wekî "bombeya serwîsên nepenî" tê binavkirin. Di nûçeya têkildarî mijarê ya di rojnameya ZAMANê de tê diyar kirin, bûyerên ku bi vê bombeyê têne lidarxistin, bi giştî nayên ronî kirin. Di nûçeya navborî de tê bibîrxistin ku teqînên li dijî Bahriye Uçok, Ahmet Taner Kışlalı, Ugur Mumcu û bûyera ku par li Amedê li ber dersxaneyekê hatibû lidarxistin û bibû sedema kuştina gelek kesan jî bi heman bombeyê hatine lidarxistin.... Lewre kiryarên wan bûyeran jî heta niha baş nehatine destnîşankirin...

Li aliyê din li hemberî bûyerê îro gelek nerazîbûn hebûn. Di serî de Serokwezîr Receb Tayîb Erdoğan û Serokê CHP'ê Deniz Baykal gelek rayedar hatin cihê bûyerê der barê pêkhatina bûyerê de agahî stendin û nerazîbûna xwe anîn zimên...

Her wisa, bûyer ji hêla Meclîsa Aştiyê ya Tirkiyeyê, DTP, EMEP, ODP, MAZLÛMDER, DİSK û gelek saziyên sivîl ve jî hate şermezarkirin... Saziyên navborî banga "li dij sekinîna şîdetê" kirin...

Serokê DTP'ê Ahmet Turk, di daxuyaniya xwe ya têkildarî mijarê de bûyer bi tundî şermezar kir û got: "Em vê bûyerê wekî derbeyeke ku li aştî, pêvojo û pêşerojê hatiye xistin dinirxînin."

---

AHMET TURK: Em bi tundî şermezar dikin

Hevserokê DTP'ê Ahmet Turk, êrîşa bombeyî ya li Stenbolê bi tundî şermezar kir, diyar kir ku dema mirov di teqînê de navnîşaneke esehî nîşan bide, ev dê bibe sedema aloziyê û wiha got: "Di gelek bûyerên ku beriya niha hate gotin ku PKK'ê kiriye de, Ergenekon derket."

Meclisa Partiyê ya DTP'ê, yekemîn civîna xwe ya piştî 2'yemîn Kongreya Asayî ku di 20'ê tîrmehê de lidar xistibû, li Navenda Giştî pêk anî. Berî civînê, Hevserokê DTP'ê Ahmet Turk, der barê teqîna li Stenbolê çêbû de daxuyaniyek da. Turk, diyar kir ku ji ber teqînê ew pir xemgîn bûne û wî bûyer bi tundî şermezar kir.
Turk, diyar kir ku bûyer derbeyek li aştî û pêşerojê ye. Turk wisa got: "Dema mirov di teqînê de navnîşaneke esehî nîşan bide, ev dê bibe sedema aloziyê. Divê ev bûyer bi gelek aliyên xwe bê lêkolînkirin. Di gelek bûyerên ku berî niha hatin gotin ku PKK'ê kiriye de, derket holê ku kiryar, Ergenekon e."
Her wiha îro PKK û Kongre Gel jî diyar kirin ku eleqeya wan bi bûyerê re nîn e û bi tundî êrîşa li Stenbolê şermezar kirin.

FOTO: www.sansursuz.com