Riha

Meşa şaredar, mebûs û siyasetmedarên kurd ên BDP/HDP'yî yên ji bo piştgiriya berxwedana Kobanê li Pirsûsa hemberî Kobanî li dar ket.

Êrîşên çeteyên DAIŞ'ê yên li hemberî Kantona Kobanê didomin û hilbijêrên HDP û BDP'ê jî di nav de li navçeya Pirsûsê ya Rihayê û bi hezaran kes li hember êrîşan hatin cem hev. Girse li ber Navenda Çand û Hunerê ya Amara hatin cem hev. Di nav wan de Hevseroka Giştî ya HDP'ê Fîgen Yuksekdag, parlamenterên HDP'ê Gulseren Yildirim, Nursel Aydogan, Demîr Çelîk, Faysal Sariyildiz, Îbrahîm Bînîcî, Hevşaredara Bajarê Mezin a Amedê Gultan Kişanak, gelek hevşaredar, endamên meclisên şaredariyan û bi hezaran kesan berê xwe dan gundê Zareta Serxet a navçeya Bêrecûkê. Dê çalakvan li gundê Zareta Serxetê konê deynin. Her wiha di wesayîtan de posterên Rêberê PKK'ê Abdullah Ocalan, alên PKK û YPG'ê hatin daliqandin û welatiyan dirûşmayên; "Bijî berxwedana YPG", "Bijî Serok Apo", "Bijî berxwedana Kobanê" berz kirin.

ÇETEYAN DERMAN DIKIN

Berî meş dest pê bike Hevseroka HDP'ê Yuksekdag ji bo rojnamegeran axivî û diyar kir ku Kobanê bi hovane hatiye dorpêçkirin û wiha got: "Çeteyên DAIŞ'ê çekên giran ku li Iraqê bi dest xistine, anîne Rojava û bi taybetî jî êrîşî Kobanê dike. Ji bo piştgiriyê em li vir in. Heta niha ev sînor ji bo çeteyan tu tiştek îfade nekirin. Bi rehetî sînor derbas bûn, çek birin û anîn. Birîndarên çeteyan derman dikin. Bi rehetî hatin vir, ev ax wekî baregeha lojîstîk bi kar anîn, çûn û hatin. Ev derfet rasterast ji aliyê dewleta Tirkiyeyê û hikûmeta AKP'ê ve ji bo çeteyan hat dayîn. Lê gel nikare li ser heman sînorî re derbas bibe. Dewleta Tirk bi vê helwesta xwe ve piştgiriyê dide qetlîamê û şer, pêşî li qetlîaman vedike, divê demildest dewlet vê helwesta xwe biguherîne."

Yuksekdag da zanîn ku çete li gelek deveran sînor bi kar tînin û wiha got: "Li gorî agahiyên ku me bi dest xistine, li Hatayê birîndaran dibin û tînin. Birîndarên çeteyên DAIŞ'ê anîne Nexweşxaneya Zanîngeha Mustafa Kemal ya Hatayê. Tê gotin ku hê tedawiya wan didome."

Girse berî ku bigihêje gundê Zareta ji wesayîtên xwe peya bû, posterên Ocalan, alên KCK, YPG'ê hilgirtin û dest bi meşê kirin. Di meşa li ser sînor de bênavber diruşmayên; "Bijî Serok Apo", "Bijî berxwedana YPG", "Bijî berxwedana Rojava" berz kirin. Meşa girseyê didome.

Hat gotin ku dê çalakvan li gund konê vedin û heta êrîşa çeteyan raweste dê çalakiya konvedanê bidome.

**

Nûçeyên eleqedar:

- Ahmet Turk: Eger ez ciwan bama ezê biçûma Kobanê minê şer bikira 

- Xelîl Osman: Civandina Kongreya Netewî pêwîstiya herî mezin e 

- Mebûs û Şaredarên HDP û BDP'ê ji bo Kobanê diçin Pirsûsê 

- Ji KNK'ê banga xwedîderketina li Kobanê

- 'Li Kobanî bi sedhezaran kes bêne kuştin wê wijdana Barzanî jî pê biêşe' 

- Salih Muslim: ‘Kobanî têk biçe dê vîna kurd bişkê'

- Pêşverû û Yekîtî: Em ji bo parastina Kobanê amade ne

- Kordînasyona kantonên Rojava tevlî serferberiya Kobanê bû

- Hikumeta Kobanê seferberî îlan kir