Cemil Oguz

Vê mehê em çîrokek pir alî, lê di heman demê de çîroka ku rastî neheqiyeke gelek mezin hatiye pêşkêş dikin. Çîroka Şaredara Gimgimê Sabîte Ekîncî ku ji peywerê hatibû girtin û ev 6 sal in ligel ku cezaya wê xilas bûye jî bernadin. Kerem bikin…

Sabîte Ekîncî (Kaya) di sala 1970’yî de li Gimgima Mûşê tê dinê. Zarokatiya wê li Gimgimê derbas dibe. Malbata wê malbateke welatparêz e û malbateke aso vekiriye ku çi kur, çi keç hemû zarokên xwe dide xwendin. Sabîte Ekîncî jî didin xwendin. Ew dibistana seretayî û navîn li Gimgimê, lîseyê li Elezîzê dixwîne û paşê li Enqereyê, di Beşa Fakulteya Perwerdehiyê ya Pîşeyî ya Zanîngeha Gazî de xwendina xwe temam dike.

DIBE MAMOSTE

Ekîncî di dema xwendekariya xwe de di nav koroya gel de cih digire, bi awayekî amator di nav şanoyê de jî cih digire. Piştî ku dibe mamoste, li gelek bajaran karê mamostetî dike û di sala 1998’an de li Stenbolê bi cih dibe. Mamostetiya xwe li Stenbolê didomîne.

ŞANO Û SÎNEMA

Ekîncî piştî tê Stenbolê ji aliyek ve mamostetiya xwe didomîne, ji aliyê din ve di bin banê Navenda Çanda Mezopotamyayê (NÇM) de dixebite û ew şanoya ku nîvco hiştiye dixwaze bidomîne. Di lîstika Dario Fo “Em û Ew” de dilîze. Di salên 2005-2006’an de li beşa Sînema-Tv ya Mujdat Gezen de perwerdehiyê dibîne. Ev yek rêyek din jî lê vedike, rêya sînemageriyê. Û kurtefîlmê xwe yê yekemîn “Herşey Bembeyaz” dikişîne. Sabîte Ekîncî ku bi xwe mamoste ye, di vê kurtefîlmê xwe de jî çîroka mamosteyekî tîne ziman, mamosteyê rastî xwendekarên ku ji bilî kurdî bi tu zimanên din nizanin tê, pêşkêş dike. 

XELATA BELGEFÎLMÊ SERKETÎ

Ekîncî dûre li ser jiyana Cîhan Sîncar belgefîlmê bi navê “Dotmam” dikişîne û di sala 2011’an de jî bi belgefîlmê “Bedensiz Ruhlar” karê xwe yê sînemayê didomîne. Ew, bi vî belgefîlmî heman salê li Festîvala Fîlman a Porteqala Zêrîn a Antalyayê û paşê li Festîvala Fîlman a Navneteweyî ya Ayvalikê xelata Belgefîlmê Herî Serketî digire.

DIKEVE NAVA SIYASETÊ

Sabite Ekîncî ligel karên xwe yê hunerî, ligel jinên kurd jî di nav kar û xebatê de ye. Ew jî wekî hemû kurdan derdekî wê heye û ji bo vî derdê xwe têkoşîna xwe didomîne. Bi awayekî çalak karê xwe didomîne. Loma jî jinên derdora wê ji bo Şaredariya Gimgimê wê pêşniyar dikin û ew jî qebûl dike. Di hilbijartina şaredariyan a sala 2014’an de Sabite Ekîncî wekî berendama BDP’ê bi sedî 63.4 wekî Hevşaredara Gimgimê tê hilbijartin. Tenê 2 salan li ser kar dimîne. Di van 2 salan de çi ji dest tê dike. Bayê binçavkirin û girtina siyasetmedarên kurd, şaredarên kurd radibe û ew ba tê xwe li Gimgimê jî diqelibîne. Ekinci jî wekî gelek şaredarên din tê girtin. Roja 9’ê sermaweza 2016’an bi îdîaya “Endamtiya rêxistinê” ew tê tewqîfkirin û dewlet kayûmê dişîne Şaredariya Gimgimê.

CEZA XILAS DIBE LÊ BERNADIN

Ekîncî dişînin Girtîgeha Tîpa E ya Mûşê û êdî jiyana wê ya li girtîgehê dest pê dike. Dadgeh, 7 sal 6 mehan cezayê hepsê lê dibirîne û wê dişînin Girtîgeha Jinan a Sîncana Enqereyê ku hê jî li wir e. 

Li gor hesabê îro ku em ketine meha sermawezê tam 6 salên Sabîte Ekîncî li hundir temam bûne. Di 28’ê pûşpera 2022’yan de cezaya ku Ekîncî divê razê temam dibe û dema berdanê hatiye. Lê ev çi ye? Bernadin. Sedem? “Aqil negirtiye”, yanê divê hinek din razê û aqil bigire ku dê carek din tiştek wisa neke. 3 mehan tehliyeya wê tê betalkirin. Di dawiya meha rezbera 2022’yan de ev dema tehlileyeyê jî temam dibe lê dîsa nayê berdan. Îdareya girtîgehê pirsên wekî, “Te çima dest ji mamostetî berda û tu bûyî şaredar?”, “Tu derkevî tuyê çawa jiyana xwe bidomînî”, “Te qet ji pirtûkxaneya me pirtûk girtin?”, “Der barê Dayikên Diyarbekirê de tu çi difikirî?” jê dike û ji ber ne bi dilê îdareyê ye, careke din tehliyeya wê betal dikin. 

Ekîncî hê jî û bi awayekî ne hiqûqî û bi awayekî neheqî li Girtîgeha Jinan a Sîncana Enqereyê girtî ye. Vê carê divê di meha 12’yan a îsal de bê berdan. Helbet ger berdin.

Belê çîroka Şaredara Gimgimê, mamoste, şanoger û derhêner Sabîte Ekîncî ev e.

JIYANA ŞEXSÎ

Sabîte Ekîncî ku di siyasetê de paşnavê xwe bikar anî, ligel muzîkar Ahmet Kaya zewicî bû, loma di hin weşanan de wekî Sabite Kaya jî navê wê derbas dibe. Sabîte Ekîncî diya du zarokan e.

 

Sabîte Ekîncî di sala 2014'an de bi sedî 63,4 hat hilbijartin û bû Hevşaredara Gimgimê.