ENQERE

Hevserokê Giştî yê BDP'ê Selahattîn Demîrtaş da xuyakirin ku AKP ji bo encamên hilbijartinê yên li Agirî li gorî xwe biguherînê bingeh amade kiriye û bang li raya giştî ya demokratîk kir ku piştevaniya Agirî bike.

Demîrtaş daxuxuyaniyeke nivîsî weşand, diyar kir ku îtirazên AKP'ê yên li serketina BDP'ê ya li navenda Agiriyê hatine redkirin lê tevî vê yekê jî bi hincetên bêqîmet careke din tê xwestin ku encamên hilbijartinê bên guhertin.

Demîrtaş bal kişand ser rewşa hakimê îtiraz red kiriye ku ji nişke ve 'çûyîna betlanyê' dane wî û destnîşan kir ku ji bo encam bi daxwaza AKP'ê Bê guhertin, bingeh hatiye amadekirin.

AKP dixwaze li gor xwe encamê biguherîne

Daxuyanî wiha didome: "Herî dawî îtîraza li Desteya Hilbijartinê hatiye kirin hatiye redkirin û dosya ji nû ve radestî Desteya Hlibijartinê ya Bajarê Agirî hatiye kirin. Lê belê ne diyar e ku ji bo çi lê hakimê desteya hilbijartinê yê îtirazên neheq ên AKP'ê red kir ji bo 6 rojan destûra betlaneyê wî hatiye dayîn. Di vê navberê de ji bajarên derdorê bi sedan polîs sewkî Agirî tê kirin, tevahiya bajar hatiye dorpêçkirin û bi vî rengî bingeh temam bûye ku encamên hilbijartinê li gorî daxwaza AKP'ê bê guhertin. Ji hemû amadekariyan tê fêmkirin ku Desteya Hilbijartinê ya Bajêr ji bo encamên hilbijartinê bi dilê AKP'ê biguherîne ketiye nava planekê, emniyet û walîtî jî ji bo bi awayekî tund dest li nerazîbûna gel a gengaz werdin, amadekariya rewşa awarte kirine."

Demîrtaş di daxuyaniyê de dibêje, "Hikûmeta AKP'ê bi vî awayekî bi agir dilîze" û wisa dom dike: "Ne cara yekemîn e ku li Agirî bi rêbaza fenan vîna gel tune tê hesibandin. Di hilbijartinên 2009'an de jî dîsa bi heman dizîtiyê encam bi dilê AKP'ê hatibû guhertin. Ev hemû nîşan didin ku AKP dest ji rêbazên xwe yên qirêj bernedaye."

BERXWEDANA REWA

Demîrtaş da zanîn ku ewê heyetekê ji navenda partiyê bişînin Agirî û wisa dawî li daxuyaniya xwe anî: "Em hêvîdarin ku wê li Agirî nekevin nava hesabên biçûk û hurmetê nîşanî vîna gel bidin. Di rewşeke berevajî de wê hêza AKP'ê têrê neke ku berxwedana gelê me ya bi hêza xwe ya cewherî û bi rêyên rewa, rawestîne." 

Demîrtaş bang li raya giştî ya demokratîk kir ku piştevaniya Agirî bike.