Diyarname
Bernameya festîvala payîzê Filmekimi hate eşkerekirin. Di festîvalê de 21 fîlmên balkêş hene.

Festîvala Filmekimi ji aliyê Weqfa Çand û Hunerê ya Stenbolê (ÎKSV) ve tê lidar xistin. Îsal festîval di navbea 10-16'ê kewçêrê de li dar dikeve. Di festîvalê de 21 fîlmên ku di festîvalên wekî Sundance, Berlin, Cannes, Venedîkê xelat girtine dê bêne nîşandayîn. Fîlm dê li Sînemaya Emekê ya li Beyogluya Stenbolê bêne nîşandayîn.

Ji bo eşkerekirina bernameya festîvalê daxuyaniyeke çapemeniyê hate li dar xistin. Dîrektora Festîvalê Azîze Tan got; "Em îsal jî li rewşa ciwanan fikirîn û buhaya bilêtên nav hefteyê bi erzanî diyar kirin. Ger dema we hebe ez pêşniyaz dikim ku 21 fîlman hemûyan temaşe bikin."

Heft rojan di seansên 11.00, 13.30, 16.00, 19.00 û 21.30'î de dê fîlm bêne nîşandayîn. Bilêtê seansên nav hefteyê bi roj bi 3.50 YKr, bilêtên saet 19,00 û dawiya hefteyê hemû seansan bi 12 YTL, yên nîverzan jî bi 8 YTL têne firotin. Bilêtên fîlmên Gala jî bi 15 YTL'yî têne firotin.

Di çarçoveya festîvalê de Pêşbaziya Kurtefîlman a Nokia Nseries jî ku serokatiya juriyê derhênerên bira Yagmur û Durul Taylan dikin tê li dar xistin. Fîlmên ku ji bo vê pêşbaziyê di navbera 10 kewçêr - 31 berfanbara 2008'an de bêne şandin dê bêne neqandin û fîlmên ku di rêza yekem, duyem û sêyem bi dest bixin dê hem bêne xelatkirin, hem jî di Festîvala Fîlman a Stenbalê ya ku di navba 4-19'ê avrêla 2009'an de li dar bikeve de bêne nîşandayîn.

Filmekimi yekem car di sala 2002'yan de li dar ket. Îsal 7'emîn car li dar dikeve û festîval her ku çû zêdetir bal kişand. Par 30 hezar kesî di festîvalê de li fîlman temaşe kir û îsal jî li benda heman eleqeyê ne.

Di festîvalê de derhênerên navdar ên wekî Woody Allen, Matteo Garrone, Laurent Cantet, Hayao Miyazaki, Kim Di-duk, Wong Kar-wai, Michael Winterbottom, Mike Leigh, Errol Morris,  Abel Ferrera bi fîlmên xwe dibin mêvanê festîvalê.