Diyarname

Di Kongreya Stenbolê de Hevserokê BDP'ê Selahattin Demirtaş bang li hikumetê kir ku Şoreşa Rojava bipejirîne û wekî Başûr bi Rojava re jî têkiliyê deyne. 

BDP'a Bajarê Stenbolê îro li Caferaga Spor Salonu ya Kadikoya Stenbolê 2'yemîn Kongreya xwe ya awarte li dar xist. Gelek mebûsên BDP'ê û bi hezaran kes beşdarî kongreyê bû.

Hevserokê BDP'ê Selahattin Demirtaş axaftineke kir û bal kişand ser gelek xalan.

Vane ji axaftina Demirtaş çend not:

- Tenê ji bo tabelaya me li dar bimîne gelek hevalên me jiyana xwe dan. Mebûsên me hatin kuştin. Em li ber van şehîdên xwe, li ber van nirxên xwe bi hurmet serê xwe ditewînin.

- Hevserokê PYD'ê tê Tirkiyeyê hevdîtinê çêdike, herî zêde serokê partiya ku dibêje ez sosyal demokratim dij derdikeve. Li Cemserê eskîmo şoreşek biçûk çêbikin dê li çepikan xin lê dema mesele tê ser Kurdan ew dij derdikevin.

- Polîtikaya karên derve ya Tirkiyeyê îflas kir. Gere Tirkiye vê polîtîkaya xwe biguherîne. Bi hatina Salih Muslim a Tirkiyeyê de di guherîna vê polîtîka re hin nîşane derketin holê. Gere ev guherîn bidome.

- AKP, CHP, MHP êrîşê Rojava dikin. Ger li jêrê Hatay tir hebana û wan xweseriyeke îlan bikira, van partiyan heman reaksiyon dê nîşan bidana?

Kurd bibin cîran dê çi bibe? 

- Gelo Rojava rêveberiya xwe saz kiriye, xwe bi rê ve dibin, hûn biqîrin jî hûn nikarin tiştek bikin. Wê derê qebûl bikin.

- Heta niha Iraq, Sûriye cîranên Tirkiyeyê bûn. Niha bila kurd bibin cîranên Tirkiyeyê ma wê çi bibe? Hûn li Tirkiyeyê dibêjin kurd birayên me ne. Ka biratî? Tirkiye divê têkiliyê xwe bi Kurdistana Federe re jî, bi Rojavaya XWeser re jî saz bike.

Ji bo Arinç: Di kîjan xala zagonê de bêhiqûqî heye 

- Ez bang li Bulent Arinc dikim. Ew dibêje ne hiqûqî ye ku rojnameger herin bi Ocalan re hevdîtinê bikin. Ez jî jê dipirsim: Ev 14 sal in we ew xistiye hucreyeke tenê. Ka di kîjan xala zagonê de heye ku kesek 14 salan di hucreyekê de bê girtin? Ka mafên wî? We bi xwe hiqûq binpê kiriye. Em niha dixwazin rewşa birêz Ocalan bê başkirin. Ne wekî gavavêtinek, ev yek jixwe heqê wî ye. Hûn cihê wî baş nekin dê çawa pêvajoyê bi rê ve bibe? Ev gotina wî ye, dibêje "Ev neheqî bidome ezê nikarim pêvajoyê bidomînim."

- Hûn hevalên me yên girtî, yên nexweş di rîngan de dihêlin, peywirdarên ringê di wê germê de 

neheqiyê li wan dikin. Em ji vir de ji bo we peywirdarên rînga, ji bo we dixtoran, ji bo we gardiyan eşkere dibêjin, hevalên me ji bo pêvajo xira nebe dengê xwe nakin, lê em dibêjin hedê xwe bizanin, nexwe emê hesabê wan ji we bipirsin.

Meseleya ziman 

- Tu dibêjî bi zimanê zikmakî perwerdehî nabe. Tu çawa misilman î? Em bazarê nakin. Emê bazarê çi bikin? Li ser mafên bingehîn bazar dibe? Zimanê me, çanda ma mafên me ne. Li holê şaşiyek heye, em dixwazin ew şaşî bê rastikirin. Em bazarê nakin.

Roboskî bila çareser bibe

- Hê du roj berê dayikên Roboskî bi Serokwezîr re hatin ba hev. 2 saetan derdên xwe anîn ziman. Xwestin lêborîn bê xwestin, kiryaran derxin pêşberî dadgehê.Ger li cem we piçek tirsa Xwedê hebe,hûnê kiryaran derxin pêşberî dadgehê. Me heta niha ji bo Roboskî me ber xwe da, malbatan jî ber xwe da, dayikan daxwazên xwe jî anîn ziman, em niha li bendê ne ku ka hikumet dê çi bike. Gere êdî mesele zelal bibe û dawî li şîna malbatan bê.

Foto: Cemil Oguz 

Têbinî: Li ser kongreyê emê gavek din notên cuda biweşînin. Pêre jî dîmenên rengîn ên ji kongreyê.