Sînemxan Bedirxan ku beşdarî gotûbêja di 2'yemîn Rojên Çand û Hunerê ya Cizîrê bû, qala jiyana sirgûniyê kir û got ku sirgûnî, derba herî mezin a li jiyana mirov dikeve ye. Sînemxan anî ziman ku digel sirgûniyê, tu car dev ji jiyîn û lêkolînkirina çanda kurd bernedaye û wiha dom kir: "Li Tirkiyeyê dema 2 kurd têne cem hev, bi tirkî diaxivin." Sînemxan, banga jiyandina çand û zimanê kurdî kir.

Keça kedkarê ziman û çanda kurd Celadet Elî Bedirxan a bi navê Sînemxan Bedirxan, di çarçoveya 2'yemîn Rojên Çand û Hunerê ya Cizîrê de beşdarî gotûbêja 'Çîroka Sirgûniyek' bû. Siyasetmedar, parlementer û şaredarên DTP'yî jî di nav de gelek kes beşdarî gotûbêjê bûn. Sînemxan di destpêka axaftina xwe de got; "Ez serbilind im ku li diyarê malbata Bedirxaniyan, li Cizîrê me" û aliyên trajîk ên sirgûniya malbata Bedirxaniyan vegot.

'Sirgûnî derba herî mezin a li jiyan mirovan dikeve ye'

Sînemxan, diyar kir ku sirgûnî jiyana mirovan parçe parçe dike. Sînemxan, anî ziman ku hemû malbata wê li sirgûniyê mirine, lê hesreta welat her tim di dilê wan de bûye. Sînemxan wiha got: "Xizmên me yên ku li Lubnanê li gundek dijîn û ji malbata Bedirxaniyan in, ji ber ku li Gîrîtê mezin bûne, bi yewnanî diaxivin. Ev jî, çîroka trajîk a malbata Bedirxaniyan pir baş salox dike. Sirgûnî derba herî mezin a li jiyan mirovan dikeve ye."
Sînemxan da zanîn ku digel sirgûniyê tu car dev ji jiyandina çanda kurd bernedane û wiha dom kir: "Bavê min Celadet, hê ez 5-6 salî bûm, dema ez dibirim dibistanê, her tim ji min re wiha digot 'Keça min, binhêre, em cizîrî ne, ji malbata Bedirxaniyan in û welatê me Kurdistan e. Vê yekê tu car jibîr neke.' Em hê di zarokatiya xwe de, mecbûr bûn ku heftiyê helbestek Cegerxwîn ezber bikin."
Sînemxan, banga "Bi zarokên xwe re bi kurdî biaxivin, çanda kurd bidin jiyîn" li malbatan kir.

'Min li Cizîrê veşêrin'

Sînemxan rexneya "Li Tirkiyeyê dema 2 kurd têne cem hev, bi tirkî diaxivin" kir û diyar kir ku ev ferasetek pir şaş e. Sînemxan, destnîşan kir ku divê kurd tirkî deynin aliyek û kurdî hembêz bikin. Sînemxan, li hizûra cizîriyan wesêta xwe kir. Sînemxan got ku dixwaze demek ji ya din zûtir bighîje warên xwe û dema ku mir jî, li Cizîrê were definkirin. Sînemxan bi van gotinan dawî li axaftina xwe anî: "Bi hesreta Kurdistanek azad, we hemûyan silav dikim." Kesên li salonê bûn, demeke dirêj ji bo Sînemxan, li çepikan xistin.

Ji DÎHA'yê hatiye girtin