MÊRDÎN

Ji ber ku piştgirî dane kampanyaya îmzeyan ya ji bo azadiya Rêberê PKK'ê Abdullah Ocalan, Hevşaredarên Qoserê Îsmaîl Asi û Leyla Salman, Hevşaredara Batmanê Gulistan Akel, endamên Meclisa Şaredariyê Hulya Baltaş, Hamide Çelik û komek xebatkarên şaredariyên hatin binçavkirin. Hevşaredarên Qoserê Asi û Salman piştî îfadeyên wan hatin girtin hatin berdan.

Demek dirêj e li gelek bajaran kampanyaya îmzeyan a ji bo azadiya Ocalan didome. Hinek cihan astengî dertên lê heta niha ev kampanya bi awayekî dom kiriye û hê dike jî. Niha ev kampanya bû sedema binçavkirinan. Li Qoserê, Hevşaredarên Qoserê Îsmaîl Asi û Leyla Salman li nêzî TOKI'ya Qoserê bi îdîaya ku piştgirî dane kampanyayê û kampanya jî derqanûnî ye hatin binçavkirin. Hat gotin ku ji bo lêpirsînê Asi û Salman birine Midûriyeta Emniyetê ya Qoserê.

Li Batmanê jî Hevşaredara Batmanê Gulistan Akel, endamên Meclisa Şaredariyê Hulya Baltaş, Hamide Çelik û komek xebatkarên şaredariyên hatin binçavkirin.

Piştî demekê Hevşaredarên Qoserê Asi û Salman piştî îfadeyên wan hatin girtin hatin berdan. Lê Hevşaredara Batmanê Akel û hevalên wê hê di bin çavan de ne.

Pêvajoyê sabote dikin'

Hevşaredar Îsmaîl Asi piştî hat berdan der barê binçavkirinê wisa got: "Bi hinceta kampanyaya îmzeyan hatiye qedexekirin, em hatin binçavkirin. Dewlet bi birêz Abdullah Ocalan re hevdîtinan pêk tîne. Li gorî me dê ev kampanya piştgiriyê bide pêvajoyê, bi tevî partiya xwe me ev kampanya da destpêkirin. Wekî ku haya wan ji geşedanan nîn e, ji bo pêvajoya çareseriyê sabote bikin, hem kampanyayê qedexe dikin û hem jî binçav dikin. Ev pêkanînên kêfî ne." Asi xwest ev bêhîqûqî bi dawî bibin.