NAVENDA NÛÇEYAN

Piştî ku saziya Heyva Sor a Kurdistanê bi daxuyaniyekê pêvajoya dermankirina birînên Kobanî da destpêkirin, gelek sazî û komeleyên li Almanyayê ketin nava tevgerê.

Di çarçoveya kampanyayê de, Solidarität Internatsional “Piştgiriya Navnetewî”, Icor "Kordînasyona Rêxistinên Şoreşger", MLPD “Partiya Maksîst, Lenînîst li Almanya”, Şêniyên Navçeya Bala a Kurdên Anatolya Navîn û Komeleya Çira bi dayîna alîkariya madî beşdarî pêvajoyê bûn.

Li bajarê Almanya Dûsseldorfê bi armanca destekê bidin pêvajoya ji nû ve zindîkirina Kobanî rêxistinên binavê  Solidarität Internatsional “Piştgiriya Navnetewî”, Icor,  Kordînasyona Rêxistinên Şoreşger û MLPD “Partiya Maksîst, Lenînîst li Almanya” li gel rêveberiya Heyva Sor a Kurdistanê hevdîtin pêk anîn..

Di hevdîtinê de nûnerên rêxistinan dan zanîn ku ew nirxeke mezin didin banga Heyva Sor a Kurdistanê ji bo Kobanî û gotin, beşdarbûna wan ya kampanyayê erka mirovahî ye..

Hevserokê Navenda Demokratîk a Kurdên Almanya Nav-Dem Yuksel Koç jî, anî ziman ku di vê pêvajoyê de hemû komele û rêxistinên girêdayî wan, wê bi awayekî çalak beşdarî kampanyayê bibin.

Piştî hevdîtinê, ji bo pêwîstiyên gelê Kobanî bicih bînin, her sê rêxistinan 17 hezar û 500 Euro radestî rêveberiya Heyva Sor a Kurdistanê kirin.

Bi heman armancê Şêniyên Navçeya Bala a Kurdên Anatolya Navîn jî, ji bo destekê bidin kampanya Heyva Sor a Kurdistanê, li bajarê Dortmundê şahî lidar xistin û ji hatinên şahiyê, bi buhayê 6 hezar û 500 Euro Ambulansek diyarî Kobanî kirin.

Komeleya Çira ya Kurdên Êzdî jî, di çarçoveya kampanyayê de, 10 hezar Euro bi rêya bankayê ji bo Heyva Sor a Kurdistanê şand.

Rêxistin û komeleyên ku alîkarî dan kampanyaya ji nû ve zindîkirina Kobanî diyar kirin ku wê di rojên pêş de hewldanên wan hê zêdetir dewam bikin.

Rêveberiya Heyva Sor a Kurdistanê malavahiya rêxistinên alîkar kir.