Diyarname
Romana nivîskar Firat Cewerî bi navê "Ez ê yekî bikujim" ji Weşanên Avestayê derket.

"Ez ê yekî bikujim" piştî "Payîza Dereng" ev duyemîn romana Cewerî ye. ‘Ez ê yekî bikujim’ di karakterên du kesayetiyên kurd de li ser dema nû radiweste. Di dema nû de behsa mirovên jibîrbûyî û psîkolojiya wan, behsa hêvî û armancên wan û behsa êş û xemgîniyên wan tê kirin.

Ji aliyê din ve hin sebeb çawa dikarin bibin encamên trajedîk, mirovên ku demekê bi îdealên mezin radibin çawa dikarin têkevin gerînekên melankolîk û tesadufên jiyanê mirov bi çi re rû bi rûyî hev dike bûye mijara romana ‘Ez ê yekî bikujim’. Gelo wê di romanê de kî, kê, ji bo çi bikuje? Ma wê kes kesî bikuje, an gelo qatil jî qurbanek e?
Xwendevan di romanê de dê rastî bersivan van pirsan bê û di dawiyê di bigihîje encamekê.

Kurteyeke ji romanê: ... Ev bajarê qedîm li min bûye dojeh. Ev bajarê ku ez demekê li dû rizgarkirina wî bûm, niha min dixwe, êşê bi min dide kişandin. Ev bajarê ku min bawer dikir ez ê rojekê mîna qehremanekê lê vegerim, niha lê bûme qehpik. Bajarê ku min dixwest rûmeta wî ji bin postalên biyaniyan rizgar bikim, niha rûmeta min lê di bin lingan de ye.

Firat Cewerî kÎ ye?

Firat Cewerî di sala 1959'an de li gundê Balfisê ya Mêrdînê hatiye dinê. Di salên 70'yan de digel malbata xwe li Nisêbînê bicih bû ye, di sala 1980'yî de koçî Swêdê kiriye.
Cewerî ku heta niha gelek pirtûk nivîsandiye, ji sala 1992'yan ve kovareke wêjeyî bi navê Nûdem derxist û kovar deh salan dom kir. Her wiha wî di weşanxaneya xwe ya bi navê Nûdem de gelek pirtûk weşand û hin jê jî ji zimanên biyanî wergerand kurdî.
Cewerî hê li Swêdê dijî û nivîskariya xwe didomîne. Ew ji sala 1987'an endamê PEN'a swêdê ye.
Romana Cewerî "Payîza Dereng" ji bo tirkî îsal hate wergerandin û weşandin.

Ez ê yekî bikujim / Firat Cewerî / Roman / 152 rûpel / Weşanên Avesta