Wan
Li Wanê piştî mitînga "Ne AKP ne Ergenekon çareserî Komara Demokratîk" bi beşdariya dehezaran kesî li dar ket.

Di mitînga ku li Garaja Şaredariyê hate lidarxistin û nêzî 50 hezar kesan beşdar bûn de, piştî axaftina vekirinê ya ji aliyê Wekîlê Serokê Rêxistina DTP'ê ya Wanê Selîm Ertaş ve hate kirin, Parlamenterê DTP'ê yê Wanê Ozdul Uçer axivî. Uçer, bibîr xist ku Serokwezîr Erdogan, berî niha gotiye ku DTP'ê muxatab nagire, lê êdî gelê kurd serokwezîr muxatab nagire.

'Îro roja namûsê ye'

Uçer, destnîşan kir ku Ergenekon di şexsê AKP'ê de îro li Wan, Bazîd û Amedê mirovan dikuje û wiha dirêj kir: "Hikûmeta AKP li her derê behsa dewlemendiyan dike, lê dayikên me yên cilên herêmî li xwe kirine, tên kuştin û têne lêdan. Ma ev e dewlemendî? Lê bila hemû kes zanibe ku êdî gelê kurd hişyar bûye û li rûmeta xwe xwedî derdikeve."
Uçer, anî ziman ku divê di serî de Tirkiye û DYA hemû kes zanibe ku vî gelî Rêberê PKK'ê Abdullah Ocalan wekî îradeya xwe qebûl kiriye û wiha dom kir: "Lewre jî êrîşeke li dijî rêberê xwe jî, qebûl nake." Uçer bang li gel jî kir û wiha got: "Îro roja azadiyê ye. Îro roja namûsê ye. Ji ber vê divê hemû kes derkevin qadan û daxwazên xwe bi awayekî herî bihêz bînin ziman. Divê hemû kes seferberiyê îlan bike."

'Divê AKP ji rêya xelet vegere'

Endamê Meclîsa Partiyê ya DTP'ê Alaattîn Erdogan ku herî dawiyê axivî jî, gelê kurd îro li hemî kolanan bi awayî bihêz li rûmeta xwe xwedî derdikeve û wiha axivî: "Em vê helwesta bi rûmet silav dikin." Erdogan, bang li AKP'ê jî kir û got: "Hûn di riya xelet de ne. Werin nasnameya vî gelî qebûl bikin. Me gelek caran got werin em bi hevre demokrasî û biratiyê bi hevre ava bikin. PKK'ê şansek da wan. Lê ev şans bikar ne anî. Îro li Amed û Dêrsimê gel serokwezîr qebûl nake û bersiva pêwîst dide. Serokwezîr ji ber ku ji hêrsa gelê kurd di tirse, destûra komkujiya gelê kurd daye. Lê divê ew baş zanibin ku, vî gelî heta niha bedelên mezin dan, lê ji helwesta xwe ya bi rûmet tavîz neda û jiniha û pê de jî nade."

Piştî axaftinan, nêzî 50 hezar kesan bi slogana "Emê cîhanek bê Ocalan bi serê we de hilweşînin" dest bi meşê kir. Li bajêr tedbîrên berfireh ên ewlekariyê hatine girtin. Giresa dest bi meşê kir, li Wanê piştî demeke dirêj, ket Cadeya Cumhuriyetê. Li aliyê din hemû esnafan dikanên xwe girtin.

Ji DÎHA'yê hatiye girtin