Diyarname

Dadgehê li hemberî rojnamegerên kurd lêpirsînek mezin da destpêkirin, xebatkar, nivîskar û gerînendeyên weşanê jî têde der barê 26 xebatkarên rojnameya Ozgur Gundem û DÎHA'yê de lêpirsîn da dest pê kirin. Li ser vê yekê û bi giştî êrîşên li ser azadiya ramanê Komeleya Nivîskarên Kurd li Amedê daxuyaniyek nivîskî weşand. Di daxuyaniyê de hat gotin ku piştî hilbijartina 7'ê pûşberê ji aliyê desthilatdariyê ve “Pêvajoya Çareseriyê” hat rawestandin û prosesa şer dîsa hat destpêkirin, girêdayî vê polîtîkayê, li ser çapemeniya azad û ya muxalif jî pêkûtî, zext û zorek hat meşandin. Daxuyanî wisa dom kir: "Weşanên hin TV'yan dewrî kayyûma kirin, li ser rojnameyan êrîş pêk anîn, fikr û ramanên rexneyî bi piranî ketin bin pêla lêpirsînan. Bi ser dezgehên çapemeniyê de tên girtin, rojnameger tên teşhîrkirin, tewer tên lêdan û girtin."

Komele di daxuyaniya xwe de dibêje ev hişmendiya qedexekar û êrîşkar a li ser nivîskariyê û hişmendiya azad piştî hilbijartina 1'ê sermawezê tundtir û dijwartir bûye û wisa didomîne: "Herî dawî di derheqa 26 nivîsan de doz hatin vekirin û nivîksarên wan tên darizandin. Di nava van kesan de endamên komeleya me Zana Farqînî, Eyyup Guven û Omer Agin jî cih digrin. Her wiha endamên me Hemît Dilbihar û Şengul Oğur ji mêj ve ye di zindanê de ne û bi awayek bêhuqûqî tên darizandin, em van çespandinên li ser qada azadiya derbirînê û bi taybetî zext û zora li ser endamên me şermezar dikin."

Di daxuyaniyê de Komeleya Nivîskarên Kurd bang li rayedarên dewletê dike ku demildest zexta li ser ramanê rabikin, lêpirsînan bidin sekinandin û endamên me yên girtî bidin berdan. Daxuyani wisa dawî bû: "Kesên ku ketine bin lêpirsînan tenê fikrên xwe bi riya nivîsê vegotine, ev yek jî di çarçoveya azadiya ramanê de divê were nirxandin. Yek ji prensîbên welatê demokratîk û pêşketî hebûna azadiya derbirînê ye, tenê dewletên totalîter û dagirker ji karîgeriya çapemeniyê her daîm tirsiyane. Em wekî civak sîstemek qelemşikestî û zimanjêkirî heq nakin, qebûl jî nakin."