Nenas Hîçîstanî
Nizanim saet çi ye, tiştê pê dizanim ev e ku demek ji dema tenêtiya şeva tarî ye…
Ji nişke ve min nivîsandin divê. Ez jî wiha dikim. Li dengê dilê xwe guhdarim niha. Carinan ez ji vî dengê fêm nakim. Lê li bendê dimînim bi hêviya jê fêmkirinê. Ji bo ku ji min re bibe alîkar, Farîd Farjadî guhdarî dikim. Alîkî dengê dilê min alîkî jî dengê kemana zîz… Hest û raman tevlihev dibin li min dibin bar. Di gewriya min de dibe gilêyek û nikarim daqultînim. Di nav neçariyeke bêhempa de dimînim. Gilî û gazincên xwe bi peyvan dikim. Lê zimanê min ê ku bi salane hatiye pelixandin nikare ji bin vî barê giran re derkeve. Pêşniyaza zimanê serdestî bi min dike dil.Vediciniqim ji nişkê ve, dengê Îsmaîl Beşîkçî di guhên min de. Ma wî nedigot: "Mirov bi zimanê serdestan nagihîje armanca xwe!"?..
Dil dixwaze bi zimanê serdestî bike, lê di hişê min de qîrîna bindestên bi salanan heye. Na na vê carê ez ê bi gotina dilê xwe nekim. Ez ê şer bikim bi peyvan re. Wekî teyrê anka ez ê xwe ji xweliya xwe ji nû ve biafirînim. Ez ê li berxwe bidim. Ma berxwedan jiyan nîn e? Ez ê xwe di nav zimanê xwe de kifş bikim. Ez ê xwe ji nû ve bi zimanê ku min di zikê diya xwe de guhdarî kiriye biafirînim. Ez ê dîroka xwe bi lorîkên diya xwe yên şîrînok hîn bibim. Ez ê miriyên xwe bi dengê lorînan vejînim. Ez ê dil û mêjiyê xwe bi şîrê diya xwe yê simspî bişom da ku xilas bikim xwe ji tîrên jehrîn yên serdestî…
Dil û mêjî bi hev re dibin yek. Ew jî dê ji min re bibin alîkar. Lê gunehên xwe bi min tînin. Şerm dikin ji ber hovîtiya serdestan. Ji ber aqilsiviktiya mirovahiyê dikevin di nav şik û gumanan. Hêviyên van dişkên û bi dengekî bêdengî li nav çavên min dinêrin. Di çavên min de rastî li berxwedanê tên. Dibêjin bila dîroka bêbext li xwe mikûr bê da ku Îsayê di xaçan de kutayî nebe mirovê dawî. Dibêjin bila serdest êdî seriyên mirovên ku ji laşan qetandî ji destên xwe biavêjin, û bi efû xwestinê destên xwe tefîl bikin…
12.03.2009
***
Nivîsên Nenas Hîçîstanî yên ku berê di Diyarnameyê de hatine weşandin:
- HÎÇÎSTAN
.jpg)
.jpg)
