GIRÊ SPÎ (DÎHA) 

Endamê Meclîsa Girê Spî Ebu Ciwan der barê êrîşên çeteyên DAIŞ'ê de da zanîn ku êrîş ji Tirkiyeyê hatiye organîzekirin û derdora 200 çete piştî ji Akçakaleyê sînor derbas kirine ji 3 milan ve dest bi êrîşê kirine. Êrîşên çeteyan li navenda Girê Spî û Silukê têk çûne û li derdora Îskan û Eyîn Arûsê pevçûn didome.

Êrîşên çeteyên DAIŞ'ê yên li hemberî bajarê Girê Spî û bajarokên Silluk û Eyn Îs didome. Hate îddia kirin ku 200 çeteyên DAIŞ'ê yên ji aliyê Akçakaleyê di bin çavdêriya leşkerên tirk de sînor derbas kirine duh bi şev saet derdora 01.00'an de dest bi êrîşan kirine. Der barê êrîşên dawî de ji rêveberiya Meclîsa Gel a Girê Spî Ebu Ciwan axivî û da zanîn ku 200 çeteyên DAIŞ'ê weke du kom ji rojava û rojhilatê deriyê sînor derbas bûne û ji sê milan ve êrîşê bajêr kirine. 

Navenda Girê Spî û Siluk ji çeteyan hate paqijkirin 

Çeteyan li gundê Tirkmen wesayîtek û li navenda bajêr jî wesayîtek bombebarkirî teqandin lê di navenda bajêr de rastî bersiva tund a şervanên YPG/YPJ û asayîşê hatin. Pevçûn heya van saetan jî dom kir û piraniya çeteyan hatin kuştin, beşek ji wan jî bi saxî an jî birîndarî hatin girtin. Ciwan da zanîn ku li navenda bajêr tenê 3 segvan mane û ew jî hatine dorpêçkirin. Ciwan, der barê rewşa Siluk û Eyn Îs de jî agahî dan û got li Silukê 2 wesayîtên bombebarkirî hatine teqandin û 48 çete hatine kuştin. Ciwan anî ziman ku bajarok bi giştî ji çeteyan hatiye paqij kirin. 

Li Akçakalayê perwerdehiya 21 rojan 

Ciwan bertek nîşanî helwesta Tirkiyeyê da û got ku Serokomar Tayyîp Erdogan deskeftiyên Kurdan û gelên Rojava û Suriyeyê hezim nake. Ciwan diyar kir ku çeteyên ku li Akçakaleyê 21 roj perwerdehî dibînin, êrîşê Rojava dikin. Ciwan anî ziman ku kampên penaberan ên li Akçakalayê bûne hêlîna çeteyan û got ku bi taybet ji bo perwerdehî û êrîşan Şaredarê Akçakalayê ji çeteyan re kamp ava kiriye. 

Pêşî elektrîk hate birîn pişt re çete derbas bûn 

Her wiha şervanê YPG'ê Mahmut Alîşar ê ku li sînor erkdar e jî da zanîn ku 3 rojên dawî ye li xeta sînor elektrîk ji aliyê leşkeran ve tê qut kirin û duh bi şev jî piştî elektrîk hatiye qut kirin, çete ji sînor derbas bûne û wan jî mudaxale kirine. 

Li Îskan û Eyîn Arûsê şer didome 

Li gorî agahiyên dawî jî şer û pevçûnên li herêma Îskan a bajarê Girê Sipî, bi hemû dijwariya xwe didome. Çavkaniyên herêmî dan zanîn şervanên YPG/YPJ’ê û Hêzên Asayîşê, di navenda çand û hunerê ya li nêzî herêma Îskan de, dor li komeke çeteyan girtine. Her wiha li taxa Eyîn Erûs a li başûrê bajarê jî pevçûnên diqewimin. Balafirên koalisyona navnetewî jî, deverên ku çete lê ne, bombebaran dikin.