AMED

Ji bo 4'emîn Festîvala Belgefîlman Fîlmamed start hate dayîn. Fîlmamed îsal diyarî sînemager Îslam Balikesîr ê ku li Cizîrê di jêrzemîna wehşetê de hat kuştin hatiye kirin.

Fîlmamed ku piştgiriya Şaredariya Kayapinara Amedê tê bi rê ve birin, îsal bi perspektîfa “Jiyana azad, hunera şoreşger” li dar dikeve. Festîval îsal di navbera 24-29'ê gulanê de li dar dikeve û yên ku bixwazin belgefîlmên wan di nav bernameyê de cih bigirin divê heta 25'ê avrêlê berhemên xwe bigihînin ber destên amadekaran. Ji bo bernameyê li salona Sînemayê ya Navenda Çand û Hunerê ya Ciwanan a Cegerxwînê daxuyanî dayîn.

Endamê Komîteyê Îlhan Bakir got ku di pêvajoya ku li erdnîgariya Kurdistanê pêkutî û sansura di qada siyasî, çandî û hunerî de her ku diçe zêdetir dibe de lidarxistina vê mîhrîcanê xwedî girîngiyeke taybet e. Bakir wisa got: "Sînemagerên ku xebatên fîlmên belgeyî dikin di pêvajoyeke ji têkilî û çarçoveyên pîşesazî serbixwetir û demokratîktir de fîlmên xwe çêdikin. Ev yek jî dike ku sînemaya belgeyî bibe qadeke muxalefetê ya demokratîk a pir girîng. Ji ber vê yekê, belgefîlmên ku di pêvajoya çêkirinê de nikarin bên kontrolkirin, veguherîn tê de bên çêkirin an jî sansurkirin, di pêvajoya belavkariyê û mîhrîcanan de rastî pêkutî û sansurê tên. Belgefîlman bi hincetên cuda nagirin nav bernameyên mîhrîcanan, yên ku digirin nav bernameyên mîhrîcanan jî bi pêkutiyeke biçûk dikarin dîsa ji bernameyan derbixin û heta ji bo ku ji ‘serêş’a belgefîlman bi awayekî giştî xelas bibin, beşên mîhrîcanan ên belgefîlman yek bi yek betal dikin." 

Bakir li ser armanca festîvala wan jî wisa got: "Armanca festîvala Fîlmamedê ew e ku hemû fîlmên ku nasnameyeke çandî, zayendî, bawerî, olî û etnîk biçûk naxînin, ji xwe dûr naxin; li hemberî nirxên gerdûnî yên bingehîn; mafên mirov, ajalan û xwezayê rêzdar in tevlî bernameya festîvalê bike. Festîvala me ya belgefîlman ne qadeke ku motîvasyona takekesî û qayîşkêşanî bê bipêşxistin û derhêner an jî fîlm bikevin pêşbaziyekê ye. Armanca me ew e ku em festîvala xwe bikin platformeke ku dê derhêner bên gel hev, piştgiriyê bidin hev, hevkariyê bikin, hêza xwe bikin yek û belgefîlman biafirînin, ev belgefîlmên ku bên afirandin jî bi awayê herî berbelav bigihînin gel û bi vê yekê jî motîve bibin." 

Di festîvalê de ligel nîşandayîna belgefîlman dê panel, gotûbêj, xebata atolyeyan jî bê lidar xistin.

Bakir got ku ji niha û pêde dê her sal bi "mijareke bingehîn" festîval li dar bikeve û mijara bingehîn a îsal "Berxwedan" e.