Diyarname

Lijneya Tahkîma Federasyona Fûtbolê ya Tirkiyeyê par 12 hefte ceza li lîstikvanê Amed Sporê Denîz Nakî birîbû û Nakî nekaribû bilîze. Niha Klûba Amed Sporê ev rewş bir cem Dadgeha Mafên Mirovan a Ewropayê (DMME).

Denîz Nakî par di tora civakî de peyamek weşandibû ku peyam li ser aştiyê bû. Li ser vê yekê 12 hefte ceza li Nakî hatibû birîn. Niha Amed Sporê bi daxwaznameyek serî li DMME'yê da û di daxwaznameyê de wisa got; "Denîz Nakî tekane kes e li nav sporê li hemberî fikrên wî yên siyasî ceza lê hatiye birîn ku ev yek cudaxwazî ye. Di maçan de hin lîstikvanan sembolên bîrdoziya ulkuparêz û nijadperest nîşan didin bikar anîne û hin silavên leşkeriyê dane tu ceza negirtine."

Di daxwaznameyê de xala 6'an a Peymana Mafên Mirovan ya bi awayekî adilane darizandin, xala 10'an a azadiya ramane, xala 14'an a cudaxwazî û xala 13'yan a mafê serîlêdanê saz dike nîşan dane û gotine ku di vir de îhlalkirin heye, ji ber vê ew ji aliyê madî û manewî ve ketine zirarê û xwestine dadgeh biryareke adil bide.

Parêzer Neşet Giresun ku doz bir DMME'yê got ku ger dadgeh vê serîlêdana me qebûl bike TFF (Federasyona Fûtbolê ya Tirkiyeyê) dê mecbûr bimîne di warê dîsîplînê de guherînan çêbike.

Her wiha parêzer Giresun got ku baweriya wan ew e dê dadgeh îdîayên wan ên îhlalê qebûl bike.