RÊZAN MIHEMED / ROJNEWS / SILÊMANΠ

Rêjeya xwandinê di van salên dawî de ber bi kêmî ve çûye û gihaye wê astê ku pirtûkxane vale dimînin. Pirtûkfiroş nerazîbûna xwe li dijî kêm xwandina pirtûkan û krîza darayî didin diyarkirin û sedemê sereke yê nexwandina pirtûkan jî bi bikaranîna torên civakî nîşan didin. Hunermend Elî Kerîm dibêje: “Heskirina xwendinê li gel xelkê kêm bûye.” 

Karmenda pirtûkxaneya Mala Rengîn Bihar Omer der barê rêjeya xwendinê di van salên dawî de ji bo ajansa me axivî û got: “Ez her roj di vê pirtûkxaneyê de kar dikim. Ez dibim şahid ku bi rastî asta xwandinê pir kêm bûye û ev ji bo me dibe sedema nerazîbûnê. Sedema sereke bi karanîna torên civakî ji aliyê ciwanan ve ye, li aliyê din bandora krîza darayî jî pir zêde li ser kes dike ku pere nîn e ji bo xwendina pirtûkekê bide. Ji bo ciwanan niha 10 hezar yan ji 5 hezar ji bo kirîna pirtûkan pir zêde ye.”

Şanoger Elî Kerîm jî got: “Niha heskirina xwendinê li gel xelkê kêm bûye, teknolojî sedemê serekeye ji bo vê kêmbûna xwandinê. Ez bi qasî demekê kêm li Ewropa bûm, min dît xelk di nava otobusê de şofêrên taksiyan û welatiyan hemû pirtûk li gel wan hebûn û dixwendin. Lê belê li gel me ne tenê nexwandina pirtûkan, çûyîna sînema û şanoyan ku pêwîstiyên mirovîne jî nayê dîtin.”

Hunermend Elî Kerîm herî dawî got: “Di demên kevin de me grub hebû ku kom dibûn pirtûk dixwendin û piştre li ser wan pirtûkan nîqaş û guftûgo dikirin. Min 3 pirtûk wergerandin kurdî. Car hebû ku ji ber peyvekê li gel sed kesan diaxivîm ku heya rastiya wê peyvê bibinîm min lêkolîna xwe dewam dikir. Lê belê niha ev kêm kiriye û ciwanên me li şûna mijûlê xwendinê bin, bi torên civakî re dema xwe derbas dikin û demên xwe wisa bi kar tînin.”