HAYDAR DILJEN

Kitabxaneyê kurdkî yê Stokholmî emser 20 serrîya xo pîroz keno. No kitabxane 10ê aşma 1997î de kişta Nedîm Dagdevîrenî ya ame awankerdene û wezîra kulturî ya Swêdî ya ê wextî Marita Ulvskog bi merasimêna akerd. A roje ra heta nika no kitabxane xizmetê ziwan û kulturê kurdan keno.

Kitabxane, verê Stokholmî mîyan de girawa Skeppsholme de ame awankerdene, dima 23yê adara 2011î de cayê xo bedilna û reyna Stokholm de ame Alvîk banê xo yê nikayinî. No kitabxane, Ewropa de kitabxaneyê kurdkî yo verên û tena yo.

Kitabxane de bi 30 ziwanan a 13000 kitabî û 1000 kovarî û rojnameyî estê. Bi hezaran a neşrîyat digîtalîze zî bîyo. Zafêrê nê neşrîyatî kurdkî yo û o bîn zî kurdan ser o yo. Kes şeno hem kitaban emanet bigîro, hem zî kitabxane de biwano. Xeylê kesî kitabxane de cigêrayîş zî kenê.

Ge-ge seba domanan zî kitabxane de çalakî virazênê. Seba domanan kitabî yenê wendene, resmî yenê viraştene.

Kitabxane, Stockholm de sey merkezê çalekîyanê ziwan û kulturê kurdan xebitîyêno. Kitabxane de xeylê kombîyayîşê dayîşşinasnayîşê kitaban, kombîyayîşê ziwanî û hunerê kurdan ser o yenê viraştene.

Kesê ke teber ra yenê Stokholm, cayanê ke verê zîyaret kenê ra yew zî kitabxaneyê kurdkî yo.

Kitabxane, seba swêdîyan, ziwan û kulturê kurdan ser o sey referens zî xebitîyêno. Komel û waqfa paştîgirotena kitabxaneyî hetkarîya kitabxaneyî kena. Zafêrê endam û îderekerdoxanê na komele û waqfe swêdî yê.

Nedîm Dagdevîrenî sibata 1996î de dest bi karê awankerdişê kitabxaneyî kerd. O sifte kitabxaneyî sey yew proje fikirîyayo. Dima bi xebata xo ya kerdo dezgeho daîmî.

Nedîm kişta têkilîyan a zaf jêhatî bi. Ey hem kurdan a hem zî swêdîyan a têkilîyê ronay. Ey temsîlkaranê dewleta Swêdî, yê şaredarîya Stokholmî, Dezgeho Berze yê Kulturî yê Dewleta Swêdî ya têkilîyê başî ronay. Ey winî têkilîyê başî ronay ke wezîrî amey merasimê akerdişê kitabxaneyî.

Kitabxane, di serrî sey proje xebitîya. Dima bi hetkarîya hukmat, dewlete û beledîyeya Stokholmî ya bi yew dezgeho daîmî û ci rê butçeyênda resmî amê abirnayene. Na butça ge-ge kemî bo zî, resmî esta.

Nedîm Dagdevîren kam o? Nedîm Dagdevîren kurdêno dîyarbekirij o. 1953 de Bîsmîl de ameyo dinya û 3ê adara 2007î de Stokholm de wefat kerd. O mamosteyê edebîyatî bi û kitabêndê ci yê şiîran esto. Cûntaya 12 êlula 1980î dima o zî welat ra vijya û serrê vêşêrî Sûrîye de mend û dima ame Swêd.

Emser kitabxaneyê kurdkî 20 serrîya xo pîroz keno. Helbet 20 serrî seba kitabxaneyê vêşî nîyê. Labelê seba kitabxaneyê kitabanê miletê ke ziwanê ci qedexe bo û dezgehê înan yê dewlete çin bê, 20 serrî zaf ê.

Ez seba na xebata mayinde û hêja Nedîm Dagdevîrenî zerrî ra bi hurmet a yad kena. Xebatkaran û hetkaranê kitabxaneyî rê serkewtene wazena. Ez hêvîdar a ke kurdî hetkarîya dezgeho winasîn ke seba ziwan û kulturê ma muhîm ê, bikerê. 
13.11.2017, Yenî Ozgur Polîtîka