Enqere
Parlementerên DTP'yî ku bûyerên Newrozê birin rojeva meclisê, pirsa 'wê der heqê walî û midûrên ewlehiyê ku berpirsyarên bûyeranin de muameleyek bê kirin an na?' kirin.

Cîgirê Serokê Koma DTP'ê Selahattîn Demîrtaş, Parlementerê Mûşê Sirri Sakik û Parlementerê Rihayê Îbrahîm Bînîcî her yek pêşniyarnameyek pirsê ku xwedî heman naverokê ne dan û bûyerên Newrozê anîn rojeva meclisê.
Parlementeran xwest ku Wezîrê Karên Hundir Beşîr Atalay bibersivîne. Di pêşniyarnameyê de hate diyarkirin ku li çend bajaran ji bo pîrozbahiya Newrozê destûr nehatiye dayîn, gelê ku xwestiye pîroz bike, rastî êrîşê hatiye. Di pêşniyarnameyê de bi taybetî jî bal kişandin ser qedexeyên li Sêrtê û hate diyarkirin ku di bûyeran de 5 kes bi çekê hatine birîndarkirin, 30 kes hatine derbkirin û 14 kes jî hatine girtin.
Di pêşniyarnameyê de wiha hate gotin: "Dema ev bûyer qewimîn parlementerên DTP'ê yên Amedê Birêz Akin Bîrdal û Birêz Aysel Tugluk û parlementerê Sêrtê birêz Osman Ozçelîk ji bo ku bûyeran rawestînin û dawî li gengeşiyê bînin, çûn cem Midûrê Ewlehiya Bajêr Cumalî Aydin. Li wir rastî helwestek ku li derveyê Zagona Karmendên Dewletê ya Hejmar 657'an e hatin. Di heman demê de berpirsiyarê peydakirina ewlehiyê peywira xwe xirab bikar aniye. Cumalî Aydin gotiye ‘Ez bi destê yên ku ji PKK’ê re nebêjin terorîst, ji qatilên zarokan re nebêjin terorîst, nagirim' û nexwestiye bi wan re hevdîtin çêke. Bi van axaftinên xwe yên ku mirov tehrîq dike, bûye sedema zêdetirbûna bûyeran."

Di pêşniyarnameyê de ev pirs hatin kirin:

- Çima destûr ji bo pîrozbahiya Newrozê ya ku Komîteya Amadekar xwest di 22'yê adara 2008'an de bike destûr nehatiye dayîn?

- Gelo hûn dê der heqê Walî û Midûrê Ewlehiyê ku bûne sedema derketina bûyerên ne xweş de, muameleyek zagonî bikin an na?

Ji DÎHA'yê hatiye girtin