Diyarname

Yekemîn çalakiya Newroza îsal li Geverê bi beşdariya zêdetirî 150 hezar kesî hat pîroz kirin. Geverî bi kincên xwe yên netewî qada Newrozê tije kirin û Newroza Çareseriyê ya destpêkê li Geverê bi heybet hat pîrozkirin

Newroza yekemîn a 2010'an li Geverê bi tevlîbûna zêdetirî 150 hezar kesan hat pîrozkirin. Girse ji taxan bi meşê ber bi qadê ve meşiya. Meşa herî girseyî koma ku ji Bajêrgehê hatî, bi pankarta "Herêma Bajêrgehê Newrozê pîroz dike" pêk anî. Bi deh hezaran kes bi qasî 6 kîlometreyan meşiyan û hatin qadê. Ji ber tevlibûna mezin a gel hemû rê li trafîkê hatin girtin û di demeke kin de taxên navçeyê bêdeng bûn. Li qada Newrozê gelek posterên Abdullah Ocalan û alên PKK'ê hatin vekîrin. Jin, zilam û zarok bi cil û bergeyên neteweyî li qada pîrozbahiyê rengê baharê dan her derê.

Li qadê pankartên "Bi şer û çekan ne bi diyalogê aştiyê pêş bixin", "Newroz afirandina gelekê nû ye", "Ya demokrasiyeke rastîn ya jî qet na", "Em bi rihê Sema, Ronahî û Berîvanan Newrozê pîroz dikin", hatin daliqandin.

Hevserokên BDP'ê Gulten Kişanak û Selahattîn Demîrtaş, parlamenterên BDP'ê, Hevserokê DTP'a hate girtin Ahmet Turk, parlamentera DTP'ê ya qedexeya siyasî hatiye dayîn Aysel Tugluk, Şaredarê Bajarê Mezin ê Amedê Osman Baydemîr, Şaredarê Wanê Bekîr Kaya, endamên Koma Çareseriya Demokratîk û Aştiyê, endamên heyeta dervê welat, şaredarên herêmê, endam û nûnerên saziyên sivîl amade bûn.

Li qadê ji bo agirê Newrozê lê bê dadan, cihekî taybet hate amadekirin. Her wiha ji bo mêvan û çapemeniyê cihekî mezîn hatiye çêkirin. Nêzî 500 endamên çapemeniyê Newroz şopand û 5 axaftvan û 12 hunermend derketin ser dîkê. Koma Azad, Agirê Jiyan, Rojda, Xemgîn Bîrhat, Xêro Ebas, Ferhat Tunç, Çetîn Oraner û Koma Şitlên Azadiyê bi stranên xwe tevlî coşa gel bûn.

Demîrtaş: Gelê kurd bi înkar û îmhayê tasfiye nabe

Hevserokê BDP'ê Selahattîn Demîrtaş, di pîrozbahiyên Newroza Geverê de bi kurdî axivî, bang li kurdên ku xwe înkar dikin û cerdevanan kir û got: "Werin bi gelê xwe re têkoşîneke hevpar bimeşînin."

Hevserokê BDP'ê Selahattîn Demîrtaş, navên kesên di têkoşîna demokrasiyê de jiyana xwe ji dest dane jimartin û Newroza wan pîroz kir.

Demîrtaş, diyar kir ku têkoşîna azadiyê yên ji kevneşopiya Kawayê hesinkar tên didome û wiha got: "Divê îro hemû kes vê qadê bibînin. Gelê kurd dertê qadan û destê aştiyê dirêj dike. Ger li muxataban digerin bila li vir muxatab bibînin. Wê demê dê fam bikin ku bê dê kî bibe muxatab."

Hevserokê BDP'ê Demîrtaş, anî ziman ku yekemcar e ku li pêşberî gel bi kurdî diaxive û ji ber vê axatinê li pêşberî gelê Geverê dike jî serbilind e. Demîrtaş, destnîşan kir ku wekî BDP'ê û gelê kurd Newroza 2010'an wekî Newroza çareseriya demokratîk û aştiya îlankirine û wiha axivî. "Bila hemû kes zanibin ku gelê kurd ev sal wekî sala çareseriyê îlan kiribe, bi baweriya hêza li qadan daye. Nexwe bi bawariya bi AKP'ê re îlan nekiriye. "

Selahattin Demîrtaş, wekî "Ciwanên Geverê yên gomlekê ji agir li xwe kirine" xîtab kir û wiha dirêjî da axaftina xwe: "Em ji bo silavkirina we hatin. Em hatin pîrozbahiya têkoşîna wê ya pîroz. Em wekî BDP bi hêza ji ciwanên Geverê distînin dibêjin ku em muhatbên vî karî ne."

Demîrtaş, têkildarî muxatabiyê ev tişt gotin: "Ger dixazin pirsgirêkê çareser bikin, divê teqez birêz Ocalan muxatab bê girtin. Ger tu dixwazî Qendîlê vala bikî divê tu wan jî beşdarî vê pêvajoyê bikî. Nexwe bi hatina koman ev pirsgirêk çareser nabe. Divê em van her du gelan deriyan vekin û hembêz bikin."

Banga li cerdevanan

Demîrtaş bang li cerdevanan ji kir û xwest hemû kurd di bin banê BDP'ê de li hev kom bibin û têkoşîna aştiyê bimeşînin. Demîrtaş, destnîşan kir ku heta operasyonên leşkerî û siyasî bidomin, pirsgirêk çareser nabe û wiha dom kir: "Ger ku hin kes bixwazin vê pêvajoyê bikin pêvajoya îmha û tasfîyeyê dê rastî têkoşîn û berxedanê bên. Gever sembola berxwedana li hemberî îmhayêye. Ger ku hûn gelê Geverê îkna nekin hûn kê îkna bikin jî hûn nikarin pirsgirêkê çareser bikin." Demîrtaş xwest ji bo çareseriyê gelê kurd û daxwazên gelê kurd muxatab bigre. Demîrtaş, bal kişand ser êrîşên li dijî kurdan û axaftina xwe wiha bi waîe kir: "Êrîşa Tirkiyeyê heta Ewropayê jî belav bû. Heri dawî li ser siyasetmedarên kurd ên Ewropayê û Roj TV pêk hatin. Gelê kurd tu carî vê yekê qebûl nake."

‘Gever tevahî jiyan e’

Şaredarê Bajarê Mezin ê Amedê Osman Baydemîr axivî û wiha silav da gelê Geverê: “Berxwedan jiyan e, heke berxwedan jiyan be, Gever tevahî jiyan e.”

Baydemîr, diyar kir ku bi mîlyonan Komkujiya Helepçeyê şermezar kir û îro jî bi deh hezaran Newrozê li Geverê pîroz dikin. Baydemîr, anî ziman ku li ser erdngariya Mezopotamyayê ji Dehaqan heta Saddaman gelek zalîmên mezîn derbasbûne û wiha got: “Lê di navê vê têkoşînê de gelek Mazlûm jî derbas bûn. Ji ber vê yekê hinî zulum bidome dê berxwedan jî bidome. Gelê kurd di encama têkoşîna xwe ya dayî gelek çeperên giring bi dest xistin e. Vê têkoşînê parlamenter û şareder afirandin. Ev xizmetkarên we ne.” Baydemîr, daxuyand ku azadbûna gelê kurd tenê ya gelê kurd nîn e azadbûna Rojhilatanavîn e û wiha pêde çû: “Nîha bi hezaran ciwan, siyastemedar, zarok û şaredarên kurdan di girtîgehan dane. Em jî ji ber vê yekê dibêjin an bi hevre azadî an jî bi hev re em dê biçin zindanan. Îro zarokên kurdan avêtine girtîgehan. Cihê zarokên kurdan zînadan nîn e hembêza dayîkan e.” Baydemîr cejan Newrozê li gel carek din pîrozkir û dawî li axaftina xwe kir.

DÎHA