Diyarname
Fransayê fîlmê ku dê wekî pêşberendamê Oscarê ji bo Akademiyê bişîne diyar kir. Fîlmê bi navê "Memoir of War / La Douleur " ku bi cureyê dramayê ye bû pêşberendamê Oscarê.

Sala bê dê 91'emîn car Xelatên Oscarê bêne dayîn. Welat ji bo bibin berendam fîlmên xwe wekî berendam dişînin. Fransa ku di nav sînemaya Ewropayê de cihek girîng digire fîlmê xwe ji bo Akademiyê şand. Fîlm ji romana otobiyografîk "The War: A Memoir" a Marguerite Duras hatiye girtin. Fîlmê ku derhêneriya wî Emmanuel Finkiel kiriye li ser navê Fransayê ji bo Fîlmê Biyanî yê Herî Serketî yê Oscarê hat şandin.
Serlîstikvana fîlm Melanie Thierry xelata Cesarê girtibû. Ligel Thierry lîstikvan Benoît Magimel, Benjamin Biolay û Grégoire Leprince-Ringuet rol girtiye ser milên xwe.
Fîlm di pûşpera sala 1944'an de derbas dibe. Di fîlm de nivîskareke ciwan a bi navê Marguerite ji bo der barê mêrê xwe yê ku hatiye binçavkirin û ew birine kampa Dachau agahiyê bigire mecbûr dimîne xwe nêzî naziyekî bi navê Rabier dike.
Di beşa Fîlmê Biyanî yê Herî Serketî de piştî Îtalyayê herî zêde Fransayê Xelata Oscarê girtiye. Fransayê heta niha 12 caran ev xelat girtiye.
Li aliyê din Tirkiyeyê kurtedemek berê eşkere kiribû ku wa "Ahlat Agaci" ya Nuri Bilge Ceylan ji bo pêşberendamiya Oscarê şandiye.