Nivîskar û wergêr Sîdar Jîr li ser çalakiya fûara pirtûkan a Amedê daxuyaniyeke şand. Em vê daxuyaniya wî bêyî destê xwe bidin diweşînin. Vaye ew daxuyanî: 

"Ji Raya Giştî û Xwendevanên Wêjeya Kurdî re

Wekî ku hûn jî dizanin li Amedê di navbera 18-23’yê gulanê de Fûara Pirtûkan a TUYAP’ê li dar dikeve. Ji gelek dever û bajaran nivîskar, rojnameger, weşanger tên vexwendin ji bo bernameyan… Ciyê kêfxweşiyê ye ku li bajarê Amedê ev cara yekem e ku ev fûar tê lidarxistin.

Dixwazim xalekê ragihînim raya giştî û ku hebin çend xwendevanên kurdî…

Wekî ku her kes dizane, gava kesek ji bo bernameyekê tê vexwendin, bi kêmanî çend rojan berî bernameyê ew kes tê agahdarkirin da ku li gor bernameyê xwe amade bike. Ji xweamadekirinê bêhtir bi awayekî ehlaqî û însanî divê haya wî/ê kesî/ê jê çêbibe ku vexwendiye. Ez bawer im em hemû li ser vê xalê hemfikir in.

Îcar acizî û nexweşî jî ev e ku, ez ji aliyê Komeleya Nivîskarên Kurd ve wekî beşdarê bernameya bi navê “Di Kurdî de Çîrok” ‘hatime diyarkirin’ Lê hezar car mixabin ‘serokatî’ û ‘koma xebatê’ ya ku vî karî organîze dike heta roja berî bernameyê, yanî bi awayekî dîtir, piştî ku bernameya TUYAP’ê dest pê dike bi du rojan paşê ‘serokê komeleyê’ min agahdar dike ji bo ku ez beşdarî bernameyê bibim.

Mixabin berî ku ew ji min re bibêjin ez ji çapemeniyê hîn bûm ku ez beşdar im. Vê yekê wekî însan ez gelekî êşandim. Ji dêvla ku ji çapemeniyê hîn bibim dikarîbû haya min pê bixistana yan jî wekî gelek caran komek ku ‘jixwe ji xwe re’ li komeleyê bi her awayî dixebitin û li her derê wekî nimûneyan xuya dikin hene, dikarîbûn yek ji wan nîşan bida. Ji vê bêedebiya li hember min çêtir bû.

Hesabê ‘serokatî’ û komîsyona ‘jixwerexebatê’ ya komelê çi ye ez nizanim, lê wekî nivîskar û wergêrekî ez vê sekin û bêehlaqiya li dij xwe bi tundî şermezar dikim û ez ji çend guhdarên ku ew ê li me guhdarî bikira lêborîna xwe dixwazim û beşdarî wê bernameyê nabim.

Bi hêviya ku em di rojên xweştir û geştir de bijîn û binivîsin…

Sîdar JÎR
Nivîskar/ wergêr"