Yasîn Hisên / Amûdê
Her ku mirov ji welatek ber bi welatekî din ve diçe, pêre jî gelek tiştan ji wî welatî bi xwe re tîne. Nexasim dema cara yekem be ku serdana wî welatî dike.
Xelk jê dipirsin: Te ew welat çawa dît? Filan tişt lê çawa bû? Gelo bêvan tişt lê buha bû wekî cem me? Ma te wir çawa dît?. Û wisa gelek pirsên din ên bê tam.
Berî ez helbestê li Amedê bixwînim, min ji hevalên xwe re got: Ez nikarim tu gotinan di der barê Amedê de bêjim.
Piştî ez ji Amedê vegeriyam- wekî her carê- heval û dostan ji min pirsîn ku te Diyar Bekir çawa dît, tenê gotina (baş bû, xweş bû) ji devê min derdiket, heta ku hevalekî bi hêrs bi ser min de rabû û got:
- Erê kuro, çawa baş û xweş bû?.
Min gotina xwe dîsa dubare kir: Ez nizanim bê ezê çi bibêjim, baş bû û xweş bû û hew.
Di wê kêlîkê de gotina helbestvanê tirk yê bi nav û deng Nazim Hikmet dihate bîra min (payebilinbûna welatan ne bi kolanên wan e, belê bi helbestvanên xwe ye, ji loma me ji wan re pût avakirine).
Dîsa jî Amed min lal dihêle û gotin têra wê nakin, û ez lêborînê jê dixwazim ku ez nikarim wê bikim helbestek, çiko dîrok, wefadarî, berxwedan, û helbest nabin helbest ne jî pexşan.
Ez dikarim ji heval û birayên xwe re li Amedê gotinên xwe bêjim, ku mîna spasiyê ne ji wan re, ji ber wî dilê wan ê fireh û riwê wan ê dagirtî bi girinijînan.
Ji hemû birêvebirên 10’emîn festîvala Amedê re sipasî…..
Spasiyeke taybet ji:
Arjen Arî
Tu dizanî keko bê çima destana Gilgamiş wiha bi dawî bû, yan jî te nas kir bê çima Qeregêtran li ku westiya…bawer bike bersiva min di awira te de dilîst, ji loma ezê gelekî bêriya te bikim.
Azad Zal
Ma heta çiqasî bihna te fireh e kekê min? Evîna du cêwiyan di dilê min de ye jî….ma tu dizanî ku îro Azad gelekî diaxive mîna çavên keça xwe.
Şakirê Biçûk (Cafer)
Ditirsim tu ji xewnên ku tên û diçin, lê ji bîr nabin. Her şev seyrana xewna bû…sibeh jî zemawenda xewnerojan bû.
Bi şev, kevokên sipî, Sûreke sipî, qirikên sipî, gerdenên dirêj, bejna xwe bi min re ditewînin…dema Şakiro qîr dikir destanan, bi qêrîna wî re pezkoviyekî serê xwe ji nava daristanê derdixist û ber bi min ve dibeziya, dikire qêrîn û li hember min li ser kabokan rûnişt:
- hahooo,,,,ez Şakiro biçûk im..!
.jpg)
