Şirnex
Di çarçoveya 2'yemîn Festîvala Çand û Hunerê ya Cudî Nuh a Silopiyê de bi hezaran kes li quntara Çiyayê Cudî hatin cem hev, kon vegirtin û meşk kêlan. Jinên ku xwarinên herêmî çêkirin, hirî şe kir û rêsan.

Çalakiyên di çarçoveya 2'yemîn Festîvala Çand û Hunerê ya Cudî Nuh a Silopiyê ku bi slgana, "Çand bi Cudî Jiyanê Dibîne' ji hêla Şaredariya Silopiyê ve tê organîzekirin didomin. Duh bi hezaran kesên herikîn devera Alîhezmê ya li quntara Cudî, jiyana zozanan ku parçeyek ji çanda kurdan e, pêşkêş kirin. Kurdan kon vedan, li ber konan meşk danîn û bi kêlana meşkan parçeyeke jiyana xwe nîşan dan. Jinan destar danîn, savar hêran û klam gotin.

Jinên hirî şe kir, bi rêstina hiriyê rojên berê yên li zozanan bibîr anîn. Jinên li bin konan xwarinên herêmî çêkirin, demên xweş derbas kirin. Di çarçoveya çalakiyan de Teatra Arsen Poladov lîstika xwe ya 'Çend Dîmen ji Jiyanê' pêşkêş kir. Bi hezaran kesên li qadê berhev bûn, demên xweş derbas kirin. Beşdarên bi Dîwana Dengbêjan xemgîn bûn, bi stranên Koma Evîna Botan coşiyan. Festîval bi çalatiyên cuda dom dike.

Di festîvala di bin ewlehiyên berfireh pêk hat de, welatî li derketina Silopiyê hatin rawestandin û di kontrolê de hatin derbaskirin. Li derdorên qada festîvalê jî panzer û tîmên taybet hatin cihkirin.

Her wiha di beşa îro ya çalakiyê de jî 20 hezar kes hat cem hev. Di çalakiyê de peyama girtiyên siyasî ji girtîgehê şandibû hate xwedin û ji aliyê girseyê ve bi çepikên xurt hate pêşwazîkirin. Di bernameyê de dibin konan de xwarinên herêmî hatin amadekirin û denbêjan heta êvarê klam gotin. Hunermenda NÇM'ê Ayfer Duztaş jî konser da û stranên wê gelekî hatin ecibandin. Girseyê jî li ber stranên hatin gotin govend girêda.
Di bernameyê de hunermend Şahê Bedo jî stran gotin û girse coşand.
Piştre Şaredarê Silopiyê Muhsun Kunur, axaftinek kir û ji ber ku tevlî festîvalê bûne, sipasiyên xwe pêşkêşi gel kir.

Ji DÎHA'yê hatiye girtin