Diyarname

Sala 1946’an salek girîng e di nav dîroka kurdan de. Li Mahabadê Komara Kurdistanê wê sale hat avakirin. Heta niha li ser vê Komara Kurdistanê hin pirtûk hatibûn nivîsandin. Her yekê tiştin nû diyarî rûpelên kurdî kiribûn û niha yeka din li wan zêde bû: “"Yadîgarên Komara Kurdistan a Sala 1946'an". Pirtûk ji aliyê Kakşar Oramar ve hatiye amadekirin û ji Weşanên Sîtavê derket. 

Avabûna Komara Kurdistanê sala 1946’an rûpeleke girîng û trajîk e di nav dîroka gelê kurd û Kurdistanê de. Gelek kesan li ser vê yekê gelek pirtûk nivîsandine lê her aliyek wê meseleyê her kêm maye. Niha pirtûkek nû li ber destan e û dike ku vê valahiyê hinek din jî dagire. Kakşar Oramar gelek salên dirêj ked da û pirtûk amade kir. 

Nivîskar Kakşar Oramar ku ew bi xwe ji rojhilatê Kurdistanê ye heta niha li ser Komara Kurdistana ya sala 1946’an gelek lêkolîn kir, gelek nivîsîn, hevpeyvîn kirin. Niha ew di vê pirtûkê de cih girtine. Pirtûka ku bi nave "Yadîgarên Komara Kurdistan a Sala 1946'an" hatiye weşandin ji hevpeyvîn, analîz, bîranîn, wêne, arşîv, dîtin û nirxandinan pêk tê.

Oramar di vê pirtûkê de ligel şahidên wê demê axiviye, tiştên ku nayên zanîn derxistiye holê. Oramar demek gelek dirêj ev xebat domandiye, agahiyên ji van kesan girtiye ku ev agahiyên ku zêde nayîn zanîn in û di arşîvan de jî nîn in.

Pirtûk ji du beşan pêk tê

Pirtûka ku ji du beşan pêk tê ji 648 rûpel pêk tê û rengîn e. Beşa yekem 160 rûpel nirxandin û analizên li ser komarê ne. Beşa duyem jî ji hevpeyvînan pêk tê. Di dawiya her hevpeyvînê de gelek wêneyên bi mijarê re eleqedar hatine weşandin. Ew wêne jî zêde nayên zanîn ku ev yek bi xwe qîmeta pirtûkê û meseleyê bilindtir dike.

Bi berpirsên wê demê re hevpeyvîn hatine kirin

Hevjîna Pêşewa Qazî mihemed Mîna Qazî; kure wan Elî Qazî, Îfet, Munîr, Perwîn û Suheyil Qazî (Keçên Pêşewa Qazî Mihemed), yek ji pêşengên leşkerî yên dema Komarê Dr. Seyîd Ezîz Şemzînî, mamosteyek ji dema Komarê Kerîm Zend, Wezîrê Perwerdehiyê yê Komarê Menaf Kerîmî, siyasetmedarê Komarê Xenî Bilûryan hin kesên ku nivîskar Oramar ligel wan hevpeyvîn kiriye û ew di pirtûkê de cih girtine.

Ev pirtûka niha li ber dest wekî cîlda yekemîn hatiye weşandin û wisa diyar e dê cîldên din jî bên.

- Yadîgarên Komara Kurdistan a Sala 1946'an -1 / Kakşar Oramar / Weşanên Sîtav / 648 rûpel / 2019