Diyarname
Hejmara nû ya Tîrojê derket. Tîrojê di vê hejmarê de meseleya "Xweseriya demokratîk û perwerdehiya bi kurdî" girtiye dest.

Kovara Tîrojê hejmara xwe ya nû ya 47'an derxist. Tîroj ku du mehan carekê bi kurdî û tirkî derdikeve di hejmara xwe ya sermawez û berfanbarê de dosyaya bi ser navê "Xweseriya demokratîk û perwerdehiya bi kurdî" weşandiye.

Di dema ku kurd li Bakur û li Tirkiyeyê li ser xweseriya demokratîk û perwerdehiya bi kurdî nîqaşê dikin de kovarê jî ev nîqaş di nav rûpelên xwe de daye dest pê kirin. Li ser vê yekê dosyayeke berfireh hatiye amadekirin.
Di dosyayê de Serokê Enstîtuya Kurdî ya Amedê Sami Tan, Cîgirê Serokê Kurt-Kavê Fehim Işik, Seroka EgitimSenê Zubeyde Kiliç, rojnameger Tayip Temel, Adil Zozanî, Yusuf Karataş, nivîskar Azad Zal, Adar Jiyan, İsmail Dindar li ser mijarê nivîs nivîsîne û dîtinên xwe anîne ziman. Her wiha bi Şaredarê Sûra Amedê Abdullah Demirtaş re jî li ser mijarê hevpeyvîneke hatiye kirin.

Kovarê li ser nivîskarên kurd Apê Torî û Îsmaîl Goldaş ku meha borî jiyana xwe ji dest dan jî nivîs nivîsandiye.

Her wiha di kovarê de gelek nivîsên din ku balê dikişînin jî hene. Yek ji wan nivîsa Fatih Polat e ku li ser doza siyasetmedarên kurd ku niha hê jî li Amedê didome ye. Polat di bin sernavê "Li xaçerêya 'Muzakere' û 'têkoşînê' de doza kurd" mesele girtiye dest û dibêje ku encama vê dozê dê tesîr li pêvajoyê bike.

Nivîskar Edib Polat jî çîrokek bi sernavê "Ribab û Sirûd" nivîsandiye û qala çîroka ribabekî kurd ê di serdema Derbeya 12'yê Rezberê de kiriye. Cihan Roj jî di nivîsa xwe "Don Kîşotê çanda kurd Siyabendê Silîvî" de her du aliyên wan ên dişibin hev nîşan daye.

Her wiha Bariş Avşar, Dr. Zeki Gul, Evdile Koçer, Tanil Bora, Lokman Polat, Arif Altan, Ali Fikri Işik, Mehmet Bayrak, Cuma Boynukara, Arjen Arî, Muhsin Atak, Sakine Esen Yilmaz, Ferid Edgü, Tunca Arslan bi nivîsên xwe, Yusuf Dere, Reyhan Sarhan, Kenanê Nado, Bargiran Şanaz, Aram Jiyan jî bi helbestên xwe di kovarê de cih girtine.