Kenan KEDKAR / Edene

Wênebasê kurd Rêdî Saît Toprak beşdarî “CONTEMPORARY ART ISTANBUL’ê dibe. Contemporary Istanbul wê di navbera 25-28’ê sermawezê de wê cara pêncemîn derkeve pêşbîrî  hunerhezan.

Contemporary Istanbul li Tirkiyê festîvala ku heta niha ya herî berfireh ya “hunera nûjen û aktuel” e. Ev fuar danasîna jiyana çand û hunera welatan dike.

Contemporary Istanbul ku wê çar rojan bidome, galeriyên netewî û navnetewî, ji hemû welatên dinyayê hunermend, koleksîyoner, serkarê muzeyan, kurator, rexnegerên hunerê, pêwendarên çapemeniyê û hunerhez wê di bin serbana Qesra Pêşangeh û Kongreya Navnetewî ya Lutfu Kirdarê de (Lutfu Kirdar Uluslararası Kongre ve Sergi Sarayi) werin ba hev. Yek ji van hunermendên ku beşdarî vê Fuarê dibe jî wênesazê kurd Rêdî Saît Toprak e.

Hunermend Rêdî Saît Toprak ku ev salekê ye ji bo vê Fuara Contemporary Istanbulê xebata xwe ya ku bi navê “Xwezaya Teng” çêkiriye, wê di beşa "Goruntu Sanat Galerisi"yê de derkeve pêşberî hunerhezan.

Rêdî Saît Toprak kî ye?

Toprak di sala 1983’yan de li Rihayê- Hewag/Bozova ji dayik bûye. Di 2004’an de li Zanîngeha Çukurovayê, Fakulteya Perwerdehiyê Beşa Wêneyê qedandiye. Di 2009’an de dîsa li heman zanîngehê mastir qedandiye. Rêdî aniha li bajarê Edenê, li wênexaneya xwe xebatên xwe didomîne.
Rêdî Saît Toprak heta niha di gelek pêşengehên cuda de cih girtiye û di gelek pêşbaziyên bi nav û deng de jî xelat wergirtiye. Çend heb xelatên wî yên bijarte ev in:
- 2009, 5’emîn Pêşbaziya Wêneyê ya di Navbera Xwenderkarên Zanîngehê ya Talansê de xelata Yekemîn, Stenbol
- 2008, Pêşbaziya Wêne û Peyker ya Zanîngeha Anadoluyê di Beşa Wêneyê de Xelat, Eskîşehîr
- 2007, 68’emîn Pêşbaziya Dewletê ya Wêne û Peykerê di Beşa Wêneyê de Xelat, Îzmîr
- 2005, Pêşbaziya Wêneyê ya Şaredariya Rihayê Xelata Yekemîn, Riha
- 1996, Pêşbaziya Wêneyê ya Kelaynak Xelata Yekemîn, Bêrecûg-Riha