Serokê Herêma Kurdistanê Mesûd Barzanî, gotarek di dêrendazên sazdana kongireya Partîya Demokrata Kurdistanê de pêşkêş kir û tê de da xuyakirin, ku kurd sazişê (tenazulê) ji kurdistanîbûna bajêrê kerkûkê nakin û rê jî nadin ti kes û alîyan, gelê kurd parçe bikin û rê nadin ti kes û alîyan, cenga kurd-kurd dubare pêk bihînin. Serokê herêma kurdistanê got, ku pirranîya armancên PDK yên li kurdistanê û yên di çarçêweyê Iraqê de pêk hatine.

Serokê herêma kurdistanê got: PDK wek pêdivêbûneka dîrokî ji dayik bû, da ku vên û doza gel û pêkhatên din bike yek. PDK li ser binemayê tevayîyê û jîyana bi hev re hatiye damezrandin û di evê bareyê de sînor jî derbas kiriye. Ji bilî kurd, Turkman û Erebên nav kurdistanê jî beşdarî tê de kirine.
 

Serokê herêma kurdistanê got: di kongireyên berê de hat çesipandin, ku mafê çarenivîsîyê mafê gel e û di evê kongireyê jî de, PDK mafê çarenivîsîyê kiriye heyvanê karê xwe.
 

Serokê herêma kurdistanê got: me evroj ezmona xwe ji çiya daxistiye bajêran. PDK bawer dike, ku di biwarê hukumkirinê de girêdanek di navbera partîyê, hukûmetê û parliyamentê de heye û ev girêdan li ser bingeha prensîpan e. Herweha, bawerîya me bi hebûna opozisyonê, pluralizmê û nerînên cuda heye.
 

Serokê herêma kurdistanê got: bawerîya me bi mafên mirov dihê. Divê dezgehên PDK di evê bareyê de çalaktir bin û em rola jinan jî bi nirx dibînin û ew di biwarê xebata rizgarîxwaza gel de ne kêmî mêran e.
 

Serokê herêma kurdistanê got: pirranîya armancên siyasîyên PDK pêk hatine. Belê di biwarê civakî de hîna gelek kar li ber me hene. Rewşa ewledarîyê li herêma kurdistanê baş e û bûye nimûneyeka serkevtî. Ji ber evê yekê, gelek deverên dinên Iraqê jî dixwazin ku bibin herêmên federal.
 

Di bareya gendelîyê jî de serokê herêma kurdistanê got: gendelî di nav me de heye û kêm an zêde, di hemû dam û dezgehan de dihê vedîtin. Em bi xwe li dijî gendelîyê ne û em kar dikin da ku nemîne. Divê em sistema sizayê û xelatkirinê bi cih bihînin, da ku gendelî nemîne.
 

Serokê herêma kurdistanê got: divê berpirsên PDK xwe nêzîkî hejar û xizanan bikin, ji ber ku ew hejar û xizanana li pişta PDK bûne. Divê em jîyana xizanan, kesên şehîdan û pêşmerge xweş bikin.
 

Di bareya kurdên Êzdî, Şebek û Feylîyan jî de serokê herêma kurdistanê got: kurd bi Êzdî, Şebek, Feylî û yên din ve yek parçe ye. Em rê nadin ti kes û alîyan ji ber cudayîyên oldarî kurdan parçe bikin. Çawa rêzgirtin ji Kurd re heye, divê weha jî ji Turkman, Aşûrî, Armenî, Siryanî û yên din re hebe. Çawa rêzgirtin ji Islamê re heye, divê weha jî ji olên din re hebe.
 

Serokê herêma kurdistanê got: dema ku me pirsa Iraqê çareser kir, me destê aştîyê pêşkêş kir. Belê divê aştî li ser hesaba me nebe. Kurd di Iraqê de xwedîyê mafê xwe yê neteweyî ye. Em dixwazin bajêrê kerkûkê jî bikin cihê jîyana bi hev re ya birayane, belê em ticaran sazişê (tenazulê) jê nakin.
 

Di bareya pirsa kurd a li parçeyên din jî de serokê herêma kurdistanê got: dem hatiye, ku êdî partîyên parçeyên dinên kurdistanê pirsa kurd aştîyane çareser bikin û xebata xwe berdewam bikin. Divê sûd ji pêşkevtinê, zanînê, teknologiyayê, vebûnê û demokrasîyê bihê dîtin. Divê hemû gelên evê deverê jî hev qebûl bikin, ji ber ku zimanê çek tenê malwêranîyê çê dike.
 

Serokê herêma kurdistanê got: careka din em dibêjin, ku li jêr ti pestanê jî be em rê nadin, ku cenga kurd-kurd çê bibe û dubare bibe. Ji ber ku di evê bareyê de ezmoneka me ya tehl heye û ez li vir, ji ber çêbûna cenga navxweyî, daxwaza lêborînê ji hemû qurbanîyan dikim.
 
Ji Peyamnêre hatiye girtin

***

Nûçeya eleqedar:

- Kongreya PDK'ê dest pê kir

- BDP'yî beşdarî kongreya PDK’ê dibin