DiyarName.Com

Van rojan mijar her kurd in!

Ji Amedê heta Enqere û Stenbolê kurd mijara sereke ne. Vane ew nûçe:

Dîrok: 24/12/2010

Ji Amedê heta Enqere û Stenbolê kurd mijara sereke ne. Vane ew nûçe:

Ev çend roj in kurd, pirsgirêka kurd, zimanê kurdî, xwe bi rê ve birina kurdan rojeva Tirkiyeyê û yê kurdan dagirtiye. Her kes qala vê yekê dike. Vane ji du rojan nûçeyên ku di vî warî de derketin pêş:

KCD û xweserî

Piştî ku vê mehê Kongreya Civaka Demokratîk (KCD) li Amedê li ser Xweseriya Kurdistanê nîqaş, ji wê rojê de ev mijar di rojeva Tirkiyeyê de ye. Televîzyon li ser vê yekê bernameyan çê dikin, rojname nûçeyan amade dikin. Serokê Meclisê, Ak Partî û partiyên din li dij vê ne, lê piraniya nivîskarên demokrat bi awayekê piştgirî didin vê yekê.

Ji bo ziman 10 mîlyon îmze

Piştî ku Hevserokê BDP'ê Selahattin Demirtaş li Amedê ragihand ku wê êdî li hemû qadên jiyanê du zimanî bikar bînin, aliyê kurdan kêfxweş bûn lê aliyên tirkan, gelek mebûs û serokê mecliSê jî têde gelek kes aciz bûn. Lê aliyê kurdan ji bo ziman dest bi kampanyayê kir jî. KCD, BDP, Hak-Par, KADEP, TZPKurdî, ÎHD, Mazlûm-Der, Egîtîm-Sen jî têde platformeke hate amadekirin û vê platformê dest bi berhevkirina îmzeyan kir. Ji bo kampanyayê li Enstîtuya Kurdî ya Stenbolê civîna daxuyaniya çapemeniyê hate li dar xistin (23.12.2010). Daxuyanî ji aliyê nûnerê TZPKurdî Alî Aslan ve hate xwendin. Kampanya heta 21'ê Reşemiya 2011'an ku 21'ê wê mehê Roja Ziman e wê bidome. Ev daxuyaniyên ku wê bêne berhevkirin wê ji Meclisa Tirkiyeyê, Konseya Ewropayê û Neteweyên Yekbûyî re bêne şandin.
Hedefa kampanyayê ew e ku 10 mîlyon îmzeyan berhev bikin. Serokê BDP'a Stenbolê Mustafa Avci jî diyar kir ku hedefa wan ew e ku li Stenbolê mîlyonekî îmzeyan berhev bikin.

CHP'ê piştgirî da lê AKP'ê red kir

Di Komîsyona Butçe û Planê ya Meclisê de li ser 'pêşnûmaya torbe'yê komîsyoneke hate li dar xistin. Di komîsyonê de BDP'ê li ser alîkariya xezîneyê pêşniyar kir. Mebûsê BDP'ê Hasip Kaplan diyar kir ku bêyî li rêyên ku di hilbijartinê de hatine girtin binêrin, ger partiyek li meclisê kom ava kiribe divê ji xezîneyê alîkarî bigire.
Pêşniyar hat rojeva komîsyonê. Endamê komîsyonê yê CHP'yî Mustafa Ozyurek li ser vê yekê li Serokê CHP'ê Kemal Kiliçdaroglu geriya û fikrê wî jê pirsî. Kiliçdaroglu xwest CHP piştgirî bide vê yekê. Li ser vê Ozyurek piştgirî da, lê pêşniyar bi dengên endamên komîsyonê yên AKP'ê hat redkirin.

Ji AKP'ê Çelîk: Du zimanî suîkast e

Cîgirê Serokê Giştî yê Ak Partî Omer Çelîk li ser du zimanî axivî (23.12.2010). Çelik wisa got: "Nîqaşên dawî yên xweseriyê, nîqaşên duzimanî, li hemberî demokrasiya rastîn a li Tirkiyeyê, hemberî civakeke zelal ez wekî teşebuna suîkastekê dinirxînim."

AKP naxwaze bendavê daxe

Serokê Meclisa Tirkiyeyê M. Ali Şahin ji bo rojnameya Radîkalê axivî (22.12.2010). Şahin di axaftina xwe de qala guhartina Zagona Partiyên Siyasî kir, diyar kir ku dikare daxistina bendava hilbijartinê jî bê nîqaşkirin. Duh (23.12.2010) li ser vê mebûsê BDP'ê Bengi Yildiz got divê zûtirîn demê de hem bendava hilbijartinê biguhere hem jî alîkariya xezîneyê û diyar kir ku ew ji Ak Partî li benda daxuyaniyekê ne. Cîgirê Serokê Koma AK Partî Suut Kiliç jî wisa got: "Berî hilbijartinê fikra me ya guhartina bendavê nîn e."