Cemil OGUZ

Pirtûkeke çîrokan "Kenê Miriyan Gunehê Guran" ji Weşanên Nûbiharê derket. Pirtûk ji aliyê Mem Med ve hatiye nivîsandin û hêjayî xwendinê ye. Ew dibêje, “Niyeta min ew e dema kesek xwend bêje tehmek cuda di vê de heye."

Ji nav cureyên wêjeyê her bala min li ser çîrokan e û her ku pirtûkek ji cihek derdikeve ez dixwazim bixwînim. Helbet yên zêde bala min dikişînin û yên nikaribin balê bikişînin jî çêdibin. Lê niha yek gihîşt ber destê min ku min kêfek xweş jê girt: "Kenê Miriyan Gunehê Guran". Pirtûka parêzer û nivîskar Mem Med e.

Bê sînoran helbestên jî çîrokê dinivîse

Mem Med heta niha sê pirtûkên helbestan (yek bi tirkî, didu jî bi kurdî) weşandibûn û ev 5 sal bûn ku sekinîbû. Niha bi cureyeke din, bi pirtûkeke çîrokan li pêşberî xwendevanan e.

Wî, bi helbestê dest pê kiriye ku pêşî pirtûkên wî yên helbestan derketine lê di heman demê de çîrok jî nivîsandine. Lê ew nû hatine weşandin. Ew dibêje ez li ser romanê jî dixebitim lê diceribînim, dibe bineweşînim jî. Lê dosyeya wî ya din a çîrokan amade ye û ewê bike ku demek paşê biweşîne. Ew wisa dibêje, "Ez sînoran çênakim, ez xwe wekî helbetvan, çîrokbêj jî qebûl nakim, tiştek xweşa min diçe ez dikim. Ji bo kêfê dikim. Çi xweşa min diçe ez dikim. Heta ji min tê ez dikim."

‘Bila bêjin tehmek cuda heye’

Mem Med bi çîrokên gundê xwe, derdora xwe dizane, li ser wan jî difikire û her ku dixwaze lê dike, lê tîne û van lê zêde dike, "Di dema nivîsandinê de ez ji xwe re sînoran çênakim. Fikrek çêdibe, ez diafirînim, tiştên gelêrî tên dikevin, an tiştek ji gundê min tê, ji zozanê min tê ez wê jî diguherînim, dixim... Niyeta min ew e dema kesek xwend bêje tiştek cuda di vê de heye, tehmek cuda heye."

Pirtûka Mem Med "Kenê Miriyan Gunehê Guran" ku ji Nûbiharê derketiye ji sê beşan pêk tê. "Kenê Miriyan", "Gunehê Guran" û "Çîrokên Cuda". Çîrok di bin van beşan de hatine pêşkêş kirin.

Tehma çîrokên gelêrî

Bi temamî 13 çîrok di pirtûkê de hatine pêşkêş kirin. Bi mijarên xwe çîrok balkêş in. Carinan bi "Ez nivîskar im" serboriya çîroka nivîskarekî trajîk nîşan dide, carinan bi "Vir Delal" guherîna serdemekê nîşan radixe ber çavan. Canbaziyên "Cengoyê Cambaz", evîna "Ji me çêtir"an, hestê gundiyek bi "Ezrail", her yek tehmek cuda dide xwendevan. Û "Ezo", "Canim" her yek bi mijar û bi zimanê xwe yê herikbar diherikin diçin. Her çiqas çîrok biherikin biçin û jî dawiya hin çîrokan baş nehatibe girêdan. Lê dîsa jî çîrok serketî ne û hêjayî xwendinê ne. Di yek çîrokê de (Ezraîl) nivîskar binî de wekî not diyar kiriye ku ew mesele ji devê xelkê bihîstiye lê wî lêaniye. Ev û hema bêje hemû çîrokên di pirtûkê de tehma çîrokên gelêrî didin ku ev yek xweş kiriye, hem jî serketîbûna nivîskar nîşan dide. Kesên ji çîrokan hez dikin teqez dê ji pirtûka "Kenê Miriyan Gunehê Guran" hez bikin.

Mem Med kî ye?

Mem Med li Bazîdê hatiye dinê, parêzer e û li Stenbolê dijî. Heta niha di kovarên wekî Nûbihar, Tîroj, Çirûskê de nivîsên wî bi kurdî, di 'Kurt Tarîhî' de jî bi tirkî hatine weşandin. Heta niha yek jê bi tkirkî çar pirtûkên wî derketine. Pirtûkên wî yên ku heta niha derketine ev in:

- Esmera, helbest (Bi tirkî), Artshop, 2010

- Berdin bila tarî be, helbest, Nûbihar, 2012

- Janistan, helbest, Nûbihar, 2014

- Kenê Miriyan, Guherê Guran, çîrok, Nûbihar, 2019

"Kenê Miriyan, Guherê Guran" 4'emîn pirtûkan Mem Med e ku derketiye.