ENQERE
Partiya Aştî û Demokrasiyê (BDP) amadekariyên kongreya xwe ku wê di 4'ê rezberê de li dar bixe temam kir.
Kongreya ku wê bi diruşma "Em bi Xweseriya Demokratîk Komara Demokratîk silav dikin" bê lidarxistin diyarî bîranîna Endamê Meclisa Giştî ya Bajarê Wanê Yildirim Ayhan ê ku di çalakiya mertalên zindî de ji aliyê leşkeran ve hate qetilkirin tê kirin.

BDP'ê amadekariyên 2'yemîn Kongreya xwe ya Mezin temam kir. Kongre wê li Salona Sporê ya Ahmet Taner Kişlaliyê li dar bikeve û ji bo vê amadekariyên teknînî temam in. Kongre dê bi lîsteya blok bê kirin û meclisa partiyê jî dê ji kesên ku ked dane û bibiryar in pêk bê. Ji bo hilbijartina namzetên Meclisa Partiyê pîvanên wekî "kesên ku wê di avakirina Xweseriya Demokratîk de xwedî soz bin û li dijî êrîşan vînek pêş bixin" bingeh hatine girtin û dîsa li ser pîvana xebata aktîf jî sekinîne.

80 endamên MP'ê

Namzetên Meclisa Partiyê (MP) ji aliyê Komîsyona Kongreyê ve ji mulaqatê têne derbaskirin. Di mulaqatan de cewherên namzetan ên rêxistinkirinê û hunerên wan ên siyasetê li ber çavan tê derbaskirin. Piştî hevdîtinan wê 80 endamên bingehîn û 40 jî yêdek bêne diyarkirin.

Di kongreyê de lêgerînên yekgirtinê û bêhtir wê nasnameya BDP'ê derkeve pêş. Ji bo berendamtiya hevserokatiyê parlamenterê berê Mahmut Alinak serî lê da ye lê tê texmînkirin ku Selahattîn Demîrtaş û Gultan Kişanak wê ji bo hevserokatiyê bêne hilbijartin.

Kongreya xweseriyê 

Kongreya ku wekî "Kongreya Xweseriya Demokratîk" tê binavkirin bi dirûşma "Em bi Xweseriya Demokratîk, Komara Demokratîk silav dikin" tê lidarxistin. Ji bo kongreyê afîşên bi kurmancî, kirmanckî (zazakî), tirkî û zimanê suryanî hatin amadekirin û dê ji bo Xweseriya Demokratîk a ku berî demekê KCD'ê îlan kir jî peyamên girîng bên dayîn. Guhertinên ku dê di rêzikname û bernameyê de bêne kirin jî li gorî xweseriya demokratîk bêne kirin.

Di kongreyê de ji bilî wêneyên Yildirim Ayhan ê ku di çalakiya mertalên zindî de hate qetilkirin dê wêneyê Husnu Ablay, Cîhan Denîz, Mazlum Dogan û Sema Yuce jî li salonê bêne daliqandin.

Ji bo kongreyê ji welat û derveyî welat gelek partiyên siyasî, nûnerên rêxistinên sivîl ên civakî hatin vexwandin. Vexwendiname bi kurdî û tirkî hatin amadekirin û hin kes jî bi telefonê hatin vexwandin. Ji delegesyona biyanî gelek kes dê beşdarî kongreyê bibin. Musteşarê MÎT'ê yê berê Cevat Oneş jî ji bo kongreyê hat vexwandin û wî diyar kir ku ew ê bi hêviya kongreya aştiyê bi kêfxweşî beşdarî kongreyê bibe.

Serîlêdana Yeni Şafakê red kirin

Di vê navberê de ji 60'ê zêdetir saziyên çapemeniyê jî ji bo kongreyê bişopînin serî li BDP'ê dan. Gelek qunciknivîskar jî ji bo kongreyê hatin vexwendin û çapemenî eleqeyeke mezin nîşanî kongreyê dide. BDP'ê yekem car di vê kongreyê de akredîtasyon pêk anî. BDP'ê serlêdana rojnameya Yenî Şafakê ku berî demeke siyasetmedarên kurd kiribû hedef û manşete "Kujer hûn in" bikar anîbû qebûl nekir. Bi vî rengî BDP'ê yekem car li dijî saziyeke çapemeniyê ambargo danî.