Kadrî Esen  MA / AMED

Pêla înkarkirina kurdî gihîşt navçeya Farqînê ya Amedê û kayûmê wê li şûna tabeleya bi kurdî, tirkî û îngîlîzî tabeleya bi tenê tirkî li ketin û derketina navçeyê çikand. Hevşaredarên Farqînê gotin ku tabeleya hatiye çikandin nenaskirina kurdan û zimanê wan e.

Înkarkirina kurdî ya ji aliyê dewletê ve bi destê kayûmên ku bi fermana Wezareta Karên Hundir tayînî şaredariyên HDP’ê hatine kirin didome. Ev pêla înkarkirina kurdî ya bi destê kayûman piştî Bedlîs, Wan û Mêrdînê gihîşt Amedê jî. Kayûmê Farqînê tabelaya bi kurdî, tirkî û îngilizî ya li têketin û derketina navçeyê rakir û li şûnê tabeleya tenê bi tirkî çikand.

TABELA BI VEŞARÎ RAKIRIN

Di sala 2014’an de dema ku Şaredariya Farqînê di destê DBP’ê de bû, hevşaredarên demê yên navçeyê ji aliyê rêya Amed û Êlihê ve tabeleya bi kurdî, tirkî, îngîlîzî ya ku li ser “Hûn bi Xêr Hatin Farqînê” nivîsandî li têketin û derketina navçeyê çikand. Lê piştî ku di sala 2016’an de kayûm tayînî şaredariyê hat kirin, di nav demê de bi awayekî dizî ev tabele hat rakirin. 

TABELEYA TENÊ BI TIRKÎ!

Qeymeqamê Farqînê Mûrat Ozturk ku di meha çileyê/rêbendanê de wekî kayûm tayînî Şaredariya Farqînê hat kirin, ji bo dîsa tabela bê çikandin dest bi xebatan kir. Lê ligel ku ji bilî karmendên dewletê gelheya navçeyê ji sedî sed kurd e jî kayûm Ozturk di 6’ê nîsanê de li şûna tabeleya hatiye rakirin tabeleya tenê bi tirkî “Silvan’a Hoş Geldiniz” li têketin û derketina navçeyê çikand.

ŞAREDARÎ KIR QAYMEQAMIYÊ RAGIHAND!

Ligel ku karê tabeleyê karê şaredariyê ye jî kayûm Ozturk ev guhertin li ser hesabê medya civakî yê Qeymeqamiya Farqînê bi van gotinan ragihad: “Ji aliyê Amed û Êlihê ve li têketina navçeya me ji aliyê şaredariya me ve “Hûn bi Xêrhatine Farqinê” xebata tabelaye bironî hatiye kirin.”

BERTEKA HEVŞAREDARÊN FARQÎNÊ 

Me ji Hevşaredarên Farqînê Naşîde Toprak û Abas Hîlmî Azîzoglû yên ku kayûm tayînî cihê wan hatiye kirin mesel pirsî. Hevşaredaran wisa got: "Ne îro bi salan e çand, huner û zimanê kurdî tune dihesibînin. Di nav salekê de 3 kayûm hatin ser vîna gelê Farqînê. Kayûmên borî Saziya Jinan a Meyayê, Saziya Ziman a Farqînê, Saziya Çand û Hunerê ya Zemfîlfiroş girtin. Ligel ku Farqîn ji sedî 100 kurd e îro jî kayûmê nû tabeleya ku peyvekî jî kurdî têde tune ye li navçeyê diçikîne. Ev tê wateya nenaskirina kurdan û zimanê wan. Em jî vê tunehesibandinê qebûl nakin û şermezar dikin. Em dibêjin pir zimanî, pir çandî û hebûna zimanê kurdî..."

WÊ AKP DAXUYANÎ BIDE

Me bi rêya telefonê xwe gihand Endama Lijneya Biryar û Birêvebirina Navendî ya Beşa Jinan a Navenda Giştî (MKYK) ya AKP’ê Sûna Kepoglû ku ji Farqînê û mijar jê pirsî. Ligel ku dîmena tabelayê ji aliyê Qeymeqamiya Farqînê ve li ser Twitterê hatibû parvekirin û ecibandibû jî Kepoglû angaşt kir ku haya wê ji mijarê tune ye û derbarê ecibandinê de jî got dibe ku zarokên wê dîmen ecibandibin. Piştî vê yekê got ku wê mijarê bipirse û pişt re li me vegere û telefon girt. Piştî demekê li me vegeriya û got ku mijarê bi Serokê AKP’ê yê Bajêr ê Amedê Şerîf Aydin re axiviye û wê têkildarî mijarê îro Aydin daxuyanî bide çapemeniyê.