BARZAN ÎSO - QAMIŞLO

Şeva din li Qamişloyê li hemberî mala ku siyasetmedarê kurd Meşal Temo lêbû sûîqest hate lidarxistin. Di encama sûîqestê de siyasetmedarê kurd Temo jiyana xwe ji dest da û kurê wî Marsel Temo û parêzer Zahîde Reşo jî bi giranî birîndar bûn.

Li gor agahiyên gihiştine ANF’ê, plakaya wesayîta kesên ku sûîqet li dar xistine ya Şamê bû. Partiyên kurd ên siyasî jî dibêjin ku li pişt sûîqestê rejîma Sûriyeyê heye.

Serokê PYD’ê Salih Muslim jî got; “Vê sûîqestê em pir xemgîn kirin” û diyar kir ku bi vê sûîqestê dixwazin yekîtiya di navbera partiyên kurd têk bibin. Muslim diyar kir ku îstîxbarata tirk jî di nav de, dibe hêzên derve jî ev cinayet pêk anîbin û got; “Pêwîstî bi lêpirsîneke berfireh heye.”

Parêzer Zahîde Reşo ya ku bi bîrîndarî ji sûîqestê filît jî got; “Kesên ku sûîqest li dar xistin bi erebî diaxivîn.”

Li gor agahiyên ku ji rayedarên Konseya Rêveber a Meclisa Netewî ya Sûriyeyê hatine girtin, Temo yek ji 29 endamên konseyê bû. Rayedarên Konseyê dan diyarkirin ku Temo wekî yek ji 7 rêberên konseyê hatibû hilbijartin, lê wê ev biryar piştî derketina Temo ya ji Sûriyeyê bi hatiba eşkerekirin.

Gava ku nûçeya sûîqestkirina Temo hate weşandin, bi hezaran kes li ber Nexweşxaneya Ferman a Qamişloyê kom bûn. Her wiha li paytext Şamê, li Efrîn, Qamişlo û Kobaniyê meşên protestoyî hatin lidarxistin.

Ji ber îdîayên revandina cenaze, ciwanan heta serê sibê nobet li nexweşxaneyê girtin.

Hate diyarkirin ku wê îro di saet 11.00'an de* cenazeyê Temo were veşartin û tê payîn ku girseyeke mezin beşdarî merasima cenazeyê bibe.

Temo di 15’ê gelawêja 2009'an de ji aliyê hêzên ewlekariyê ve li Kobaniyê hatibû revandin û piştî du hefteyan aşkere bû ku di destê hêzên ewlekariya dewletê yên Helebê de ye. Bi hinceta “pevçûnên di nava gel de û cudakariyê teşwîq kiriye” 3,5 sal ceza lê hate birîn û di 5’ê pûşpera 2011'an de serbest hat berdan.

Temo di sala 1958’ê de li Derbesiyê ya girêdayî Hesekê ji dayik bûye. Yek ji damezrînerên Platforma Celadet Bedirxan, Komîteya Saziyên Sivîl ên Civakî û rêberê Tevgera Herikîna Dahatûyê bû.

Ji ANF'ê hatiye girtin

*Ev nivîs berî merasima cenazeyê hatiye nivîsin.

***

Nûçeyên eleqedar:

Wêne ji malpera Elsahat hatiye girtin