Diyarname
Koma Şêwra Xwendinê vê carê li ser "Pêşaneha Sûretan" nirxandineke kir û em vê nirxandinê diweşînin...

Koma Şêwra Xwendinê ku li Stenbolê mehê careke tê ba hev û li ser pirtûkek bi kurdî nirxandina xwe dike, her yek dîtinên xwe li ser pirtûkê dibêje, vê carê mijara wan pirtûka nivîskar Îrfan Amîda "Pêşangeha Sûretan" bû.

Şêwra Xwendinê li ser pirtûk û nirxandina beşdaran hin not amade kirin û em van notan radigihînin we:

Ji Aciziyên Rexneya Kurmancî Têbîniyên Şêwira Xwendinê!

Li ser navê rexneyê, wekî xwendevanên şewirê, em naxwazin van tiştan êdî bixwînin. Rexne ne ev e:

1- “Pêşengeha Sûretan” ji nav Weşanên Lîsê de di gulana 2011’an de çap bû û li pirtûkxaneya kurdî zêde bû.
2- Ev berhem roman e û nivîskar xwestiye çîroka xwe bêje.
3- Ev behrem ji 5 pêşengehan pêk tê û 256 rûpel e.
4- Giraniya vê berhemê 270 gram e û ebatên wê ji 135X195 e.
5- Ev yekem romana helbestvan Îrfan Amîda ye. Zimanê nivîskar herêmî ye û helbestî ye.
6- “Pêşengeha Sûretan” serkeftî ye û bi rastî jî em Îrfan Amîda pîroz dikin.
7- Ev pirtûk li hemû pirtûkfiroşên kurdî peyda dibe û buhayê wê li gora giranîya wê ye.
8- “Divê” her xwendevan vê berhemê du caran bixwîne da ku fehm bike! Ji xwe rexnevan fambar in, ew bi carekê dizanin berhema baş û xerab kîjan e û kêfa wan ji şîretan re tê.
9- Ev ne daxuyanî ye û ne jî rexne ye!

Bi xwendina “Pêşengeha Sûretan” em kêfxweş in, ji bo ku ji zû ve me romanek bi vê tahmê nexwendibû. Ji bo vê romanê dîtinên me yên hevpar ev in:

1- Nîviskar hesabê xwendavanên xwe kiriye û bi matematîka romanê serê xwe êşandiye.  
2- Leheng, bûyer, ziman û şêwaza nîvîskar bi me xweş hat. Em texmîn dikin ku derdên nivîskar û avangardbûnê tune ye.
3- Di vê romanê de wekî lehengê sereke nîvîskar, axirê tune ye û axirê şîret jî tune.
4- Nivîskar têra xwe û têra xwendevanê xwe bîrbir e. Bi vê romanê em xweş li ber dikevin ku nivîskar, di “Pêşengeha Sûretan” de civaka kurdî, bi wêjaya xwe, li ber çavê xwendavanên xwe radixe.
5- Têkiyên serdestî û mêraniyê xweş veçirandiye û berbiçav kiriye.
6- Bi xwendina vê romanê, hêvî û motîvasyona xwendina me zêde bû. 

Pirsên Ji Bo “Pêşengeha Sûretan”:

1- Carinan di vegotinê de tevliheviyek heye, pîştî demekê xwendevên pê dihese û ji çîrokê tê derdixe ku leheng kî ye.
2- Di rêwîtiya “Serwên” de, mirov gelek caran nizane otobus bi ku ve diçe?
3- Di destpêka romanê de navê romanê wekî “Pêşanga(e)ha Sûretan” hatiye nivîsandin.
4- Em hêvîdarin ku edîtor hînekî din bala xwe bide berhema ber destê xwe.

**
Her wiha Şêwra Xwendina di kombûna xwe ya pêş me de dê "Peşmerge"ya Rehîmê Qazî bigire dest û nirxandinê bike. Kombûna bê ya Şêwra Xwendinê dê di 30.10.2011'an de li dar bikeve.