AMED
Helbestvanê kurd Cegerxwîn di 27'emîn salvegera mirina xwe de li Navenda Çanda Ciwanan a Cegerxwîn a Şaredariya Kayapinara Amedê bi panela "Jiyana Cegerxwîn û wejê" hate bibîranîn.

Çalakiya ku ji aliyê Komeleya Nivîskarên Kurd a Amedê ve hate lidarxistin de moderatoriya wê helbestvan Şêxmûs Sefer kir û helbestvan Rênas Jiyan jî wekî axifger beşdar bû.

'Cegerxwîn kesayeteke nasyonalîst e'

Helbestvan Rênas Jiyan li ser navê Cegerxwîn rawestiya û diyar kir ku navên dîrokî yê gelê kurd wekî navê Cegerxwîn li xwe kiriye kurdî ye û ev yek jî kesayeta Cegerxwîn a welatparêz û nasyonalîst derdixe holê. Jiyan da zanîn ku gelê kurd di merhaleyeke zor û zehmet re derbas dibe, dê gelê kurd zêdetir li nirxên xwe xwedî derkeve û wiha got: "Hin derdor dikarin vê xwedî derketinê wekî neteweperestî bidin nîşandin. Lê ne rast e. Xwedî derketina ziman, çand û nirxên gelê kurd welatparêzî ye û Cegerxwîn jî li gor dema xwe kesayetiyekî nûjen bû."

Jiyan, li ser hezkirina gelê kurd ya li hemberî nivîskarê rus Dostoyevskî rawestiya û sedema vê yekê jî wekî pirtûkê Dostoyevskî nîşan da. Jiyan gotina xwe wiha domand, "Gelê kurd ji Dostoyevskî gelek hez dike û sedema vê yekê jî di pirtûka Dostoyevskî de welatparêzî heye û ev rih di helbestên Cegerxwîn de jî xwe derdixe pêş."

Helbestvanekî wekî Gilgamêş

Rênas Jiyan li ser jiyana Cegerxwîn jî sekinî û diyar kir ku Cegerxwîn di destpêkê de miroveke oldar bû û di nav demê de wekî Gilgamêş bûye kesayetiyekî nasyonalîst û wiha dom kir: "Ev meşa Cegerxwîn meşeke Gilgamêşî ye û herî dawî li Stockholmê xelas bûye. Helbesta wî ya bi navê 'Hêvî' ji bûyerên civakî ku bi demê ve girêdayî ye. Cegerxwîn mirovekî nûjen e û ev yek jî di helbestan de gelek diyar e."

Helbestvan Jiyan sedema metafor û alegorîkbûyîna helbestên Cegerxwîn jî vegot û wiha dawî li axaftina xwe anî: "Cegerxwîn helbestvanekî bê dewlet e. Yanî pişta xwe dide xwe û bi tena serê xwe li dijî astengî û aloziyan têdikoşe. Ev yek jî dibe sedema hin tiştan mirov nikaribe bi rehetî bêje û bike metafor bilêv bike."

Jiyan herî dawî pirsên beşdaran bersivand û helbesta Cegerxwîn a bi navê "Daristana Xebata" xwend.

Ji DÎHA'yê hatiye girtin