Diyarname

Lîstika Şermola Performansê ya bi navê “Bûka Lekî” dest bi tûrneya xwe  kir. Lîstik li Batman, Amed û Wanê dê derkeve ser dikê.

Li gor gotina endamên Şermola Performansê fikra vê berhemê ji çîroka Sadiq Hîdayet ya bi navê “Bebika li pişt perdê” hatiye girtin. “Bûka Lekî” ku di sala 2011’an de li Stenbolê dîsa wekî produksîyona Şermola Performansê û bi derhênerîya Mîrza Metîn hatibû sehnekirin, niha bi versiyona nû, bi rejî û sêwirînerîyeke nû û bi lîstikvanên nû vê carê li Batmanê tê pêşkêş kirin û paşê dê here du bajarên din jî. 

Bûka Lekî ku komediya reş e mijara wê bi vî rengî ye: “Zilamekî ku piştî trawmaya leşkerîyê ji jiyana xwe ya rastî dûr diçe û dikeve rêxa mêranîyê û dibe robot… Jineke ku ji ber evîna zilamî ji jiyana xwe ya rastî dûr dikeve û her ku diçe dibe kesayeteke plastîk… Jineke lal ku bîna rêxa mêranîyê hildide lê nikare mudaxale bike... Û bûkeke bêcan, bêrih û lek, ango mankeneke plastîk ku her tişt di derdora wê de diqewimin…”

Sê rêbenên absurd wekî ku di lêva kendalekî de bimeşin di derdora bûka lekî de diçin û tên. “Bûka Lekî”, piştî “Mem û Zîn”ê duyemîn berhema Şermola Performansê ye ku li Batmanê tê amadekirin û pêşkêşkirin.

Lîstik 2’yê mehê li Batmanê cara pêşî hat lîstin û li gor bernameyê 13 û 27’ê vê mehê dê dîsa li Batmanê li Yenisahneyê bê lîstin.

Her wiha di çarçoveya tûrneyê de lîstik roja 7’ê mehê li Amedê li sehneya Şanoya Bajêr a Amedê, rojên 17 û 18’ê mehê jî li sehneya Şanoya Mencel a Wanê derkeve pêşberî temaşevanan. Li hemû cihan lîstik saet 20.30 de dest pê dike.

KUNYE:

BÛKA LEKÎ

Komedîyeke Reş

Nivîskar û derhêner: Mîrza Metîn

Lîstikvan: Pelda Bal, Ronî Dildar, Leyla Devecî

Muzîk: Dodan

Edilandina hereketan: Arjen Brûsk

Sêwirînerê dekor, kostum û ronahîyê: Mîrza Metîn

Asîstan: Kenan Demîr, Robîn Ozel, Zelal Angay

Fotograf, fragman: Veysel Seçen

Sêwirînerê afîşê: Ronî Dildar

Operatorê teknîkê: Kenan Demir

75 dq. 1 perde, bi kurdî