Cemil Oguz

Her çiqas weşangerî di nav rewşeke zehmet de be jî ev kar bi awayekî didome, pirtûk çap dibin û niha li 3 bajarên mezin, 3 fûarên mezin amadehiya lidarketinê dikin. Rojên lidarketina van 3 fûaran diyar bû. Li gor bernameyê li Amedê, Stenbolê û Îzmîrê, sê fûar ligel hemû zehmetiyan jî dê li dar bikevin.

AMED: FÛARA MEZOPOTAMYAYê

Li Amedê serdema fûara hinek tevlihev e. Demek TUYAP’ê fûar li dar xist, paşê Şaredariya Bajarê Mezin a Amedê fûar lidar xist û weşangerên kurd jê dilgeş bûn, lê piştî kayûman ev xebat jî rawestiya. Niha her du sazî jî ne li holê ne lê vê carê li Amedê bi hevkariya kompaniya ALZ, DTSO (Odeya Sanayî û Bazirganî ya Amedê) û TYB’ê (Yekîtiya Weşangerên Tirkiyeyê) fûara pirtûkan li dar dikeve. Fûar bi navê Fûara Pirtûkan a Mezopotamyayê li dar dikeve. Îsal dê fûar rojên navbera 16-22’yê rezbera 2022’yan bi beşdariya gelek weşanxaneyan li dar bikeve. 

Ji bo amadehiyên fûarê 10’ê mehê li DTSO’yê bi beşdariya Endamê Rêveberiya Navendî yê DTSO Faruk Korkmaz, Serokê Komîsyona Fûarê yê DTSO’yê Ali Deniz, endamê komîsyonê Ahmet Akyapi, rêveberên ALZ’yê û weşangerên kurd civîneke hat li dar xistin. Di civînê de li ser amadehiyên fûarê nîqaş hatin kirin û biryar hatin girtin. Di rojên pêş de dê bernameya fûarê bê eşkere kirin. Wieşanxaneyên kurd dê di fûarê de standê vekin.

ÎZMÎR: ÎZKÎTAP

Li Îzmîrê bi piştgiriya Şaredariya Bajarê Mezin a Îzmîrê “ÎZFAŞ” û SNS Fûarcilik “ÎZKÎTAP” (Fûara Pirtûkan a Îzmîrê) li dar dikeve. Fûar berê li navenda Îzmîrê li parka mezin dihat li dar xistin û gelek kes bi rehetî diçûn wir. Îsal birine Gazîemîrê ku li Îzmîrê cihek dûr e. Hê ne diyar e dê çend weşanxane beşdar bibin lê lidarketina wê teqez e. Li gor bernameyê fûar wê roja 28’ê kewçêrê dest pê bike û 6’ê sermawezê bi dawî bibe.

Di fûarê de weşanger, saziyên sivîl dê standan vekin. 

STENBOL: TUYAP

Li Stenbolê îsal Fûara Pirtûkan a Stenbolê dê 39’emîn car lidar bikeve. TUYAP vê fûarê lidar dixe û bernameya îsal dê di navbera 3-11’ê berfanbarê de li dar bikeve. Mêvana rûmetê ya fûarê a îsal nivîskar Nazli Eray e. Di fûarê de bi sedan weşanxane û saziyên sivîl standan vedikin. Weşanxaneyên kurdan jî li Stenbolê di fûarê de standan vedikin û îsal jî dê cihê xwe bigirin.

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.